Qaraǵandyda ótken jartylaı marafonda Belarýs sportshysy jeńimpaz atandy
QARAǴANDY. QazAqparat - Qaraǵandyda «Armanǵa jol» jartylaı marafony ótti. Sharaǵa qatysýshylar Táýelsizdik alańynan start aldy, dep habarlady QazAqparat Qaraǵandy oblystyq ishki saıasat basqarmasyna silteme jasap.
Bıyl jartylaı marafonǵa 5 myńnan astam adam qatysty. Olardyń arasynda Qaraǵandy oblysy men elimizdiń ózge de óńirlerinen, sonymen qatar Ýkraına, Qyrǵyzstan, Belarýs sııaqty shet memleketterden kelgen sportshylar da bar.
Marafonda sportshylar 4 topqa bólinip júgirdi. «Balapan» atty birinshi topqa 8- ben 14 jas aralyǵyndaǵy órender kirdi jáne olar 2 km qashyqtyqqa júgirdi. Qalǵan eresekterge arnalǵan qashyqtyqtardyń ishinde «Drýjba» toby 7 km, «Spýtnık» toby 15 km, «Armanǵa jol» toby 97,5 km qashyqtyqqa jol tartty.
«Balapan» tobynan qyzdar arasynda Vıktorııa Sharova birinshi keldi, Vıktorııa Shımpf ekinshi, al Natalıa Labetskaıa úshinshi keldi. Uldar arasynda Stepan Spasskıı birinshi orynda bolsa, ekinshi oryndy Daýlet Berikbol, úshinshi oryndy Vladlen Ivanov jeńip aldy.
Balalar 30-dan 50 myń teńgege deıingi aralyqta aqshalaı syılyqtarmen marapattaldy.
Jartylaı marafonnyń bas júldesi 1 mln teńgeni Belarýs sportshysy Vladıslav Prıamov jeńip aldy. Ol sonymen qatar belgilengen qashyqtyqty 1 saǵat 6 mınýtta júgirip ótip, rekord ornatty.
«Jeńil atletıkamen 20 jyldan beri aınalysamyn. Buryn dene shynyqtyrý pániniń muǵalimi bolatynmyn, qazir júgirem deýshilerdi jattyqtyram. Ózim kásibı sportshymyn. Marafon týraly Dmıtrıı Karpovtan bildim. Biz ótken jyly Astana jartylaı marafonynda tanysqan bolatynbyz. Bıyl ol meni Qaraǵandy marafonyna shaqyrdy. Trassa óte yńǵaıly, kóshe keń, bári jaqsy. Biz aldymen 6 adam júrgirip kele jatqanbyz, men 17-shi kılometrde bárin basyp ozdym»,-dedi Vladıslav Prıamov.
Áıelder arasynda Qyrǵyzstan sportshysy Vıktorııa Polıýdına jeńimpaz atandy.
«Marafondy uıymdastyrýshylarǵa rahmet. Búgin keremet mereke boldy, biz úshin de qala turǵyndary úshin de. Men kásibı sportshymyn, halyqaralyq dárejedegi sport sheberemin. Jarys asa aýyr bolǵan joq. Óıtkeni jol jaqsy. Jartylaı marafon men úshin bıyl Djakartada ótetin Azııa oıyndarynyń aldyndaǵy synaq boldy. Qaraǵandyǵa birinshi ret kelip turmyn, maǵan bul jer unady»,-dedi Vıktorııa Polıýdına.
«Armanǵa jol» jartylaı marafony qaraǵandylyq brend bolyp qalyptasyp keledi. Ony uıymdastyrýshylar jarystyń tek júrgirýdi unatatyn azamattar úshin ǵana emes, kásibı sportshylar úshin de qyzyqty bolýyna kúsh salýda.
