Qaraǵandyda ótken halyqaralyq aıtysta Amanjol Áltaev top jardy

Aıtysqa Mońǵolııa, Qytaı, Qyzǵyzstan jáne Qazaqstannyń aqyndary qatysty, dep habarlaıdy oblys ákimdiginiń resmı saıty .

Aqyndarǵa degen qurmet eshqashan óshpeıdi, sonyń dáleli Kenshiler mádenıet saraıynda ıne shanshar jer bolmady. Oryn bolmaı ishke kire almaǵan jurt aıtysty alańda ornatylǵan jaryq dıodty ekrannan tamashalady. Aıtysty oblys ákimi Erlan Qoshanov ashyp , aqyndarǵa sáttilik tiledi: «Qaıyrly kún, qurmetti aıtysty tamashalaýǵa kelýshiler. Aıtysty saǵynǵandaryńyz kórinip tur, sebebi myna saraıda ıne shanshar jer joq. Búgingi aıtys ádil bolady, halyq pen ádilqazylardyń sheshimi bir jerden shyǵady dep oılaımyn. Myna alys-jaqyn jerlerden kelgen aqyndarǵa sáttilik tileımin», - dedi aımaq basshysy.
Júrsin Erman júrgizgen aıtysta aıtyskerler týǵan jer, ulttyq dástúr, elge qurmet jáne Qazybek bı jaıly taqyryptardy qozǵady. Aqyndarǵa KSRO jáne Qazaqstannyń halyq ártisi Asanáli Áshimov bastaǵan ádilqazylar baǵa berdi. Kelgen jurtshylyq bir kún boıyna sozylǵan aıtysty sońyna deıin tamashalady. 16 aqyn segiz jupqa bólinip, eki aınalym boıynsha upaı sandarymen basym túsken Amanjol Áltaev pen Ularbek Mınathan aqtyq synda jolyqty. Tamasha aıtysyp kópshiliktiń qoshemetine bólengen  aqyn Amanjol Áltaev jeńiske jetip, 3 mln teńgeni ıelendi.
Sáıkesinshe birinshi oryn Ularbek Mınathanǵa buıyryp, oǵan 1,5 mln  teńge tabystaldy. Ekinshi oryndy qaraǵandylyq aqyn Dıdar Qamıev ıelenip, oǵan 1 mln teńge berildi. Úshinshi oryndy Jansaıa Mýsına men Meıirbek Sultanhan ózara bólisti.Olarǵa 750 myń teńgeden tabystaldy. Basqa aqyndar da qur alaqan qalǵan joq, olarǵa alǵys hattar men qarjylaı syıaqylar tabystaldy.
Aıta keteıik, bul aıtys - respýblıka boıynsha Qaz daýysty Qazybek bıdiń mereıtoıyna oraı ótken úshinshi aıtys. Birinshi aıtys naýryz aıynda Egindibulaq tórinde ótse, ekinshi úlken aıtys Túrkistanda bolǵan eken. Ol eki aıtysta bas júldeni Aıbek Qalıev qanjyǵasyna baılaǵan.