Qaraǵandyda ótken «Ájemniń ertegisi» forýmyna myńnan astam balabaqsha pedagogy qatysty
QARAǴANDY. QazAqparat – Qaraǵandyda qazaq tilin úırenýdi nasıhattaýǵa, qazaq halqynyń salt-dástúrlerine baýlýǵa jáne balalardyń shyǵarmashylyq jáne zııatkerlik áleýetin ashýǵa baǵyttalǵan mektepke deıingi uıymdar pedagogteriniń onlaın-forýmy ótti.
Ol Qazaqstan Respýblıkasy Táýelsizdiginiń 30 jyldyǵyn merekeleý qurmetine «Oqýǵa qushtar mektep» jobasy aıasynda uıymdastyryldy.
«Forým eki bólimnen turdy – plenarlyq otyrys jáne birneshe baǵyt boıynsha sektsııalyq alańdardyń jumysy. Pikirtalas alańdary úsh baǵyt boıynsha jumys istedi: tanymdyq-shyǵarmashylyq, áleýmettik-kommýnıkatıvtik jáne tildik qyzmet, sondaı-aq mektep jasyna deıingi balalardyń kórkem-estetıkalyq qyzmeti. Balabaqshalar «Ájemniń ertegisi» jobasyn iske asyrýdyń birinshi kezeńiniń nátıjelerin kórsetti», – dep habarlady Qaraǵandy oblysynyń bilim berýdi damytý oqý-ádistemelik ortalyǵynyń ókilderi.
Forýmǵa Qaraǵandy oblysynyń bilim basqarmasynyń basshysy Gúlsim Qojahmetova, «Mektepke deıingi balalyq shaq» respýblıkalyq ortalyǵynyń dırektory Manara Adamova, sondaı-aq Soltústik Qazaqstan, Aqmola, Qostanaı jáne Atyraý oblystarynyń mamandary jáne myńnan astam mektepke deıingi mekemelerliń pedagogtary qatysty.
Sondaı-aq, mektepke deıingi uıymdar «Jas qyran» jobasy aıasynda júzege asyrylǵan «Bir otbasy – bir kitap» aktsııasyn usyndy. Ol otbasylyq mádenı qundylyqtardy damytýǵa, oqý dástúrlerin jańǵyrtýǵa, rýhanı adamgershilikti qalyptastyrýǵa, balalardy kitap oqýǵa yntalandyrýǵa baǵyttalǵan. Oǵan 600-den astam mektep jasyna deıingi balalar men ata-analar qatysty.
Forým jumysynyń nátıjesi ınnovatsııalyq sheshimder men mektep jasyna deıingi balalarǵa arnalǵan shyǵarmashylyq oıyn keńistigin qurýdyń avtorlyq tujyrymdamalary boldy. Qatysýshylar balalarǵa konstrýktıvtik-modeldik jobalar arqyly ertegiler álemin ashýǵa jáne olardy ulttyq epos pen ertegilerdi paıdalaný arqyly ǵylymı-tehnıkalyq shyǵarmashylyqqa tartýǵa múmkindik beretin birneshe qyzyqty jobalardyń toptamasyn kórsetti.
Aıta ketý kerek, «Ájemniń ertegisi» áleýmettik-pedagogıkalyq jobasy ótken jyly ázirlengen jáne qazaq halyq ertegilerin paıdalaný negizinde balalardy týǵan ólkeniń mádenıetimen tanystyrýǵa baǵyttalǵan. Joba kelesi oqý jylynyń sońyna deıin úsh kezeńde júzege asyrylady. Oǵan óńirdiń barlyq mektepke deıingi uıymdary qatysady.
