Qaraǵandyda órttiń saldarynan ákesi men 5 jasar balasy kóz jumdy
QARAǴANDY. QazAqparat - Qaraǵandynyń turǵyn úıleriniń birinen órt shyqty. Sonyń saldarynan eki adam qaza taýyp, egde jastaǵy áıel qutqaryldy, dep habarlaıdy QazAqparat tilshisi.
«20 maýsym kúni saǵat 15:51-de Qaraǵandydaǵy 12 shaǵyn aýdanynda ornalasqan bes qabatty turǵyn úıden órt shyqqany týraly habar tústi. Órt sóndirýshiler oqıǵa ornyna kelgen kezde tórtinshi qabattaǵy eki bólmeli páterdiń jıhazy men 20 sharshy metrde turmystyq zattar órtenip jatqan. Oqıǵa bolǵan úıden 41 jastaǵy er adam men onyń 5 jasar ulynyń deneleri tabyldy. Besinshi qabattaǵy páterden gaz ıisinen ýlanǵan 80 jastaǵy qart áıel qutqarylyp, aýrýhanaǵa jetkizildi», - dedi Qaraǵandy oblystyq Tótenje jaǵdaılar departamentiniń baspasóz qyzmetinde.
Sondaı-aq, qutqarýshylar turǵyn úıden 15 adamdy shyǵardy. Órt 16:25-te aýyzdyqtaldy.
Órt-synaq zerthanasynyń mamandarynyń aldyn ala jasalǵan boljamdaryna sáıkes, órttiń shyǵýyna ashyq jalyn sebep bolǵan.
