Qaraǵandyda órt sóndirýshi kólikke kedergi keldirgen júrgizýshilerge aıyppul salyndy
QARAǴANDY. QazAqparat - Kólik júrgizýshileri tótenshe jaǵdaı ornyna bara jatqan órt sóndirýshilerge jol bermeıdi, osyǵan baılanysty jol-patrýldik polıtseıleri maqsatty túrde ereje buzǵandardy anyqtap, olardy jaýapqa tartýda, dep habarlaıdy «QazAqparat» HAA tilshisi.
Jol-patrýldik polıtsııa qyzmetkerleri reıd jasaǵan bir saǵattiń ishinde arnaıy tehnıkany ótkizbegen úsh kólikti toqtatty. Olarǵa «Ákimshilik quqyq buzýshylyq týraly» kodekstiń 598-baby 1-tarmaǵy boıynsha aıyppul salyndy.
«Kólik júrgizýshileriniń arnaıy tehnıkalarǵa jol berýin jáne aýlalardaǵy joldy bógemeýlerin suraımyz. Órt sóndirýshilerdiń jyldam kelýi - adam ómirimen baılanysty jáıt. Sondyqtan árbir sekýnd mańyzdy», - dedi TJ departamenti baspasóz qyzmetiniń basshysy Qýanysh Mútállapov.
Zań boıynsha órt sóndirýshiler, dárigerler men polıtseılerdiń óz mindetterin oryndaý kezinde baǵdarshamnyń qyzyl túsinen ótýlerine jáne jol belgilerin buzýlaryna ruqsat etilgen.
«Jol júrý erejesine sáıkes, arnaıy dybys belgisi men dabyl júıesi qosylǵan kólik qurylǵylary jaqyndaǵan kezde júrgizýshiler arnaıy tehnıkanyń esh kedergisiz ótip ketýi úshin jol berýge mindetti. Taǵy bir ózekti másele - jeke avtokólikterdiń qala kósheleri men turǵyn úılerdegi joldardy bógeýi. Órt sóndirý mashınalary onsyz da az ýaqyttaryn joǵaltyp, turaqtaǵy kólikterdiń arasynan óterde kedergilerge tap bolyp júr», - dedi Qýanysh Mútállapov.
