Qaraǵandyda órt shyqqan úıden 15 adam qutqaryldy
QARAǴANDY. QazAqparat – Qaraǵandylyq qutqarýshylar órt shyqqan kópqabatty úıden 15 adamdy aman alyp shyqty, dep habarlaıdy QazAqparat tilshisi oblystyq Tótenshe jaǵdaılar departamentiniń baspasóz qyzmetine silteme jasap.
22 qazan kúni saǵat 21.09-da Passajırskaıa kóshesindegi kópqabatty úıden órt shyqqany týraly habarlama túsken. Órt sóndirýshiler 6 mınýtta jetip, úıdiń kireberisi qatty tútindep jatqanyn anyqtaǵan. Birneshe adam páterlerinen óz betinshe shyǵyp úlgergen.
Qutqarýshylar muqııat barlaý júrgizip, jertóledegi oryn-jaılardyń aǵash konstrýktsııalary janyp jatqanyn anyqtady.
Páterler men baspaldaq alańdaryn qoıý tútin basqandyqtan, órt sóndirýshiler qutqarý qalpaqtary men 3 ıindi baspaldaqtyń kómegimen úıdiń kireberisinen 15 adamdy, sonyń ishinde 6 balany evakýatsııalady.
Jertólede temperatýranyń joǵary bolýynan, ondaǵy keńistiktiń tarlyǵynan jáne qatty tútin saldarynan tilsiz jaýmen kúresý kúrdelene tústi.
Laýlaǵan ot saǵat 23.05-te tolyǵymen sóndirildi. Órtti sóndirýge jeke quramnan 26 adam jáne 5 birlik tehnıka jumyldyryldy.
