Qaraǵandyda órt saldarynan úsh adam qaza tapty
QARAǴANDY. QazAqparat - Búgin Qaraǵandyda shyqqan órttiń saldarynan úsh adam qaza taýyp, taǵy eki adam zardap shekti, dep habarlaıdy «QazAqparat» HAA tilshisi.
«Tilsiz jaý túngi saǵat 1:15-te kópqabatty turǵyn úıdiń ekinshi qabatyndaǵy bir bólmeli páterden shyqqan. Órt aýmaǵy 25 sharshy metrdi sharpydy», - dep habarlady Qaraǵandy oblystyq TJ departamentiniń baspasóz qyzmeti.
Órt shyqqan páterde eshkim bolmaǵan. Alaıda, kórshi páterdegi úsh adam ys tıip kóz jumǵan. Taǵy eki adam - áıel adam men 13 jasar bala aýrýhanaǵa jetkizildi.
TJ departamenti órt sóndirý qyzmeti men apattyq-qutqarý jumysynyń qyzmetkerleri 19 adamdy evakýatsııalap, 16 adamdy qutqardy, sonyń altaýy - balalar. Órttiń shyǵý sebebi anyqtalýda.
