Qaraǵandyda órt saldarynan 40-qa jýyq adam baspanasyz qaldy
QARAǴANDY. QazAqparat - Qaraǵandydaǵy kóp páterli baraq úıde 10 páter órtenip ketti, dep habarlaıdy «QazAqparat» HAA tilshisi.
On otbasy baspanasyz qaldy - bul 16 balany qosyp eseptegende 37 adam. Qazir olardyń basym bóligi týysqandarynyń úıine kóshirildi, qalǵandary kolledjderdiń jataqhanalaryna tegin ornalastyryldy. Qaraǵandy oblysy ákimdiginde zardap shekken otbasylaryna qandaı da bir kómek kórsetý máselesi qarastyrylyp jatqandyǵy aıtyldy.
«Ázirge naqty eshteńe aıta almaımyz. Apparat basshysy Bahtııar Omarhanov jaǵdaıdy tolyqtaı anyqtap jatyr», - dedi Qaraǵandy ákimi apparat basshysynyń qabyldaý bólmesi. Qaraǵandy oblysy Qazybek bı aýdany ákiminiń orynbasary Vadım Gormakov apat saldarynan baspanasyz qalǵan otbasylaryna bıznes ókilderiniń qoldaýyn kútetindigin jetkizdi.
«Baspanalardy qalpyna keltirýge kómektese alatyn jeke menshik kompanııalar jáne qaıyrymdylyq uıymdarymen kelissózder jasalyp jatyr», - dedi Qazybek bı aýdany ákiminiń orynbasary Vadım Gormakov.
TJ departamentiniń baspasóz qyzmetinde habarlaǵanyndaı, Vagonnaıa kóshesindegi 25-inshi úıdiń órtenip jatqandyǵy jaıly habarlama kezekshi bólimge 3 shilde kúni saǵat 23.56-da túsken.
«Órt kezinde páterlerden eki balany qosqanda segiz adam qaýipsiz jerge kóshirildi. Sondaı-aq, eki gaz ballony shyǵaryldy. Órt aýmaǵy 500 sharshy metrdi qamtydy. Úı jabdyqtary, jıhazdar, aǵash jabyndylar órtendi. Saǵat 2.21-de órt tolyqtaı sóndirildi», - dedi Qaraǵandy oblysyndaǵy TJ departamentiniń baspasóz hatshysy Aıdana Júnis. Órt sebebin saraptama nátıjesi anyqtaıdy.
