Qaraǵandyda operatordyń kamerasyn syndyrǵan jigit qamaýǵa alyndy
QARAǴANDY. QazAqparat – Qaraǵandyda jergilikti medıa-portaldyń operatorynyń kamerasyn syndyrǵan jigit 10 táýlikke qamaýǵa alyndy. Buzaqy karantın rejımin buzǵandardy anyqtaý reıdine shyqqan mobıldi toptyń jumysyna qarsy kelip, polıtsııa qyzmetkerlerine baǵynbaǵan, dep habarlaıdy QazAqparat tilshisi.
Esterińizge sala keteıik, 18 shildede karantın rejımin buzýshy nysandardy anyqtaý boıynsha reıd júrgizý kezinde jedel áreket etý ortalyǵy quramyna polıtseıler men taýarlar men qyzmetter sapasy men qaýipsizdigin baqylaý departamentiniń ókilderi, sondaı-aq BAQ qyzmetkerleri kiretin mobıldi tobymen birge karantın shekteýlerine qaramastan jumys istep turǵan «Spektr» túngi klýbyn anyqtaǵan bolatyn. Kóńil kóterýshiler arasynda polıtsııa qyzmetkerlerine baǵynbaı, BAQ jumysyna kedergi jasaǵandar da boldy. Klýbqa kelýshilerdiń biri medıa-portal operatorynyń kamerasyn syndyrdy. Sol kúni odan basqa taǵy 20-ǵa jýyq adam Qaraǵandy qalasynyń Mıhaılov polıtsııa bólimine jetkizildi.
Búgin Qaraǵandy qalasynyń ákimshilik soty 21 jasar qala turǵynyn 10 táýlikke qamaýǵa aldy.
«21 jasar tártip buzýshyǵa 667 «Quqyq qorǵaý organy qyzmetkeriniń zańdy ókimine nemese talabyna baǵynbaý» jáne 434 «Usaq buzaqylyq» baby boıynsha aıyp taǵyldy. Sotqa deıin ol Mıhaılovka polıtsııa bóliminiń ýaqytsha ustaý oqshaýlaǵyshynda bolǵan. Qaraǵandy qalasynyń mamandandyrylǵan ákimshilik soty tártip buzýshyny 10 táýlik merzimge ákimshilik qamaýǵa alý týraly qaýly qabyldady», - dep habarlady Qaraǵandy oblysynyń PD baspasóz qyzmeti.
Budan basqa, mamandandyrylǵan ákimshilik sot polıtsııaǵa qarsylyq kórsetken tulǵalarǵa qatysty taǵy úsh materıaldy qarady. Úsh tártip buzýshy bes táýlikke qamaýǵa alyndy.
