Qaraǵandyda onkologııanyń asqynyp ketýine qatysty jaǵdaılar azaıdy
QARAǴANDY. QazAqparat - Qaraǵandyda onkologııanyń asqynyp ketýine qatysty jaǵdaılar azaıdy. Sońǵy úsh jylda №3 emhanada qaterli isikti erte kezeńde anyqtaý qolǵa alyndy, dep habarlaıdy QazAqparat tilshisi.
Bul akýsher, qaraý kabınetiniń medbıkesi men ýchaskelik medbıkelerdiń obyr aýrýyn anyqtaý algorıtmin, sonyń ishinde kózben sholyp tekserý ádisterin oqyp-úırengennen keıin múmkin bolyp otyr. Sonymen qatar árbir anyqtalǵan jaǵdaı úshin syıaqy berile bastaǵan.
Qazir medıtsınalyq mekemede onkologııalyq aýrýmen aýyratyn on adam anyqtalýda. Olardyń 65%-ynda syrqattyń erte kezeńin qaraý kabınetteriniń medbıkeleri men ýchaskelik medbıkeler anyqtaıdy.
«2015 jyly onkologııanyń asqynǵan jaǵdaılary kóp boldy, onkologııadan ólim-jitim joǵary edi. Bizge ol kórsetkishterdi qysqartý úshin basqa da joldar tabý kerek boldy. Professor Baltabekov onkologııalyq aýrýlardy kózben sholyp anyqtaý algorıtmin úıretýge kelisti. 2016 jyly oqý kýrstarynan soń dıagnozdar kóptep qoıyla bastady. Jańadan anyqtalǵan jáne asqynyp ketken jaıttar kóp boldy. Qazir biz oqýdyń nátıjesin kórip otyrmyz - asqyný da ólim-jitim de tómendedi. Al erte kezeńde anyqtaý sany anaǵurlym artty», - deıdi № 3 emhana dırektory Sánııa Boranqulova.
Onkologııalyq aýrý túrin medıtsına qyzmetkerleri tek emhanada ǵana emes, úıde de anyqtaı alady. Eger oǵan ruqsat etilse, naýqasqa kezeksiz barlyq qajetti tekserýden ótýge jáne qajetti taldaýlardy tapsyrýǵa quqyq beriledi.
Emhana úıde jáne emhanada zertteýler júrgizý úshin dermatoskop satyp alǵan, ol teri qabattarynyń aýrýlaryn, onyń ishinde qaterli isikti de dıagnostıkalaýǵa múmkindik beredi.
Árbir anyqtalǵan qaterli isik túri úshin medıtsınalyq mekemeniń únemdeý qorynan syıaqy tólenedi. Onkologııany erte kezeńde anyqtaǵany úshin mamandarǵa qosymsha 20 myń teńge beriledi.
