Qaraǵandyda óndirilgen «Spýtnık V» vaktsınasynyń kezekti partııasy Almaty men Shymkentke attandy

QARAǴANDY. QazAqparat - Almaty men Shymkentke Qaraǵandy farmatsevtıka kesheninde óndirilgen Gam-KOVID-Vak preparatynyń kezekti partııasy jóneltildi, dep habarlaıdy QazAqparat.

Bul jaıynda zaýyttyń baspasóz qyzmeti málimet taratty.

Bul - koronavırýs ınfektsııasynyń aldyn alýǵa arnalǵan biriktirilgen vektorlyq «Spýtnık V» vaktsınasy.

Almatynyń «SK-Farmatsııa» qoımalaryna preparattyń II komponentiniń 19 695 qutysy (1 JT. 5 dozada) jóneltildi, bul - vaktsınanyń 98 505 dozasy.

Shymkenttegi «SK-Farmatsııa» habyna Gam-KOVID-Vak II komponentiniń 15 529 flakony nemese 77 645 doza jiberildi.

Preparattyń osy partııalary Qaraǵandy farmatsevtıka kesheni men Gamaleıa atyndaǵy ǵylymı-zertteý ınstıtýtynda sapa baqylaýynan ótti.

Jaramdy merzimi - 2022 jyldyń aqpanyna deıin.

Jóneltý jumystary keshenniń mamandandyrylǵan qoımasynan «SK – Farmatsııa» JShS refrıjerator-tasymaldaýshylaryna tıeý sýyq tizbektiń talaptaryn (temperatýra -35 gradýstan kem emes) qatań saqtaı otyryp júrgizildi.