Qaraǵandyda óndiriletin bıe súti Arab Ámirlikterine eksporttalady

QARAǴANDY. QazAqparat – Qaraǵandy oblysynda nemis tehnologııasy boıynsha biregeı ónim – muzdatylyp keptirilgen bıe súti shyǵarylady. Ónim tek Qazaqstanda ǵana emes, shetelde de belgili, dep habarlaıdy QazAqparat tilshisi.

Osakarov aýdanynyń Jansary aýyldyq okrýgindegi ferma óndiristi ulǵaıtyp jatyr.

Taýar ótkizetin jańa naryqtar ıgerilip, Dýbaıǵa jetkizý múmkindigi qarastyrylyp jatyr.

Oblys ákimi Ermaǵanbet Bólekpaev Osakarov aýdanyna jumys sapary barysynda agroónerkásip qyzmetimen tanysty.

«Bizdiń fermada qazaqy tuqymdy jylqylar bar. Mal sany 1500-den 2300-ge deıin ósti. Bıyl muzdatylǵan keptirilgen bıe sútin óndirýdi 6-dan 10 myń tonnaǵa deıin arttyramyz. Satý naryǵy da keńeıip keledi. Qazir Dýbaıda satyp alýshymen kelissóz júrgizip jatyrmyz. Sonymen qatar, ósimdik sharýashylyǵyn damytamyz. Bıyl 12 myń gektar jer egildi, jańa zamanaýı tehnıka satyp alyndy. Kelesi jyly egis alqaptaryn 15 myń gektarǵa deıin ulǵaıtýdy jáne sýarmaly jerlerdi damytý baǵdarlamasyn bastaýdy josparlap otyrmyz. Investıtsııa - shamamen 2,5 mlrd teńge. Kásiporynda 100-ge jýyq adam jumys isteıdi. Óndiristi damytý jańa jumys oryndaryn qamtamasyz etedi», – deıdi «Eýrazııa Invest LTD» JShS quryltaıshysy Ivan Georgıadı.

Fermada bıe saýý protsesi kórsetildi. Barlyǵy avtomattandyrylǵan.

Saýǵannan keıin birden sút óńdeýge jóneltiledi. Osylaısha barlyq paıdaly qasıetter saqtalady.

Kásiporynǵa barǵan kezde Ermaǵanbet Bólekpaev jańa tehnıkany aralap, fermerlermen sóılesti.

Bıyl Osakarov aýdanynda astyq jáne kartop alqaptary ulǵaıdy. Barlyǵy 444 myń ga egildi.