Qaraǵandyda oqýshylarǵa «Tar zaman» fılmine bıletter tegin taratyldy

Aıta keteıik, Facebook-tegi paraqshasynda «Argumentum.kz» bilim berý ortalyǵynyń dırektory Rahat Ahmet  birneshe kúnnen beri «Tar zaman» fılmin nasıhattap keledi. Sonymen qatar qaraǵandylyq birneshe jigittiń uıymdastyrýymen atalǵan týyndynyń kórsetilimi taǵy eki kúnge uzartylǵan bolatyn.

«Qazirgi kezde «Tar zaman» Qaraǵandyda kórsetilip jatyr. Negizi, buǵan deıin fılmdi prokatqa bir aptaǵa bergen. Jeti kúnniń ishinde olar fılmdi  3 ret qosypty. Sonyń birinshi kúni tek 2 adam ǵana, kelesi kúni tek jalǵyz ózim ǵana boldym kórsetilimde. Úshinshi kúni de az bolǵan. Qaraǵandyda «Tar zamannyń» kórsetilimi «Saryarqa» kınoteatrynda saǵat 14:00-ge qoıylǵan eken. Áleýmettik jelige kınoteatr zalynda jalǵyz otyrǵanymdy baıqatatyn vıdeony da saldym. Fılmdi tolyqtaı jalǵyz ózim kórip shyqtym, biraq odan shyqqannan keıin, mundaı týyndyny qala turǵyndary mindetti túrde tamashalaýy tıis degen tujyrymǵa keldim. Sol kúni birneshe jigit jınalyp, kınoteatrdy 2 kúnge jalǵa aldyq. Jalpy, 280 bıletti satyp aldyq. Osy eki kúnge arnalǵan bıletterdi muǵalimder men oqýshylarǵa tarattyq», - dep atap ótti R. Ahmet.

Onyń paıymynsha, otandyq týyndyǵa qalada jarnamalaý sharalary tıisti deńgeıde bolmaǵan syńaıly.

«Tar zaman» týraly Facebook-ke saldym jáne adamdar osyndaı fılmniń bolǵanyn menen estip jatqanyn baıqadym. Atap aıtqanda, tıisti deńgeıde jarnama bolmaǵan sekildi, ıaǵnı halyq estimegen. Shynymdy aıtsaq, osy jaǵdaı namysymyzǵa tıdi. Dál qazir kınoteatrdamyn. Balalar fılmdi tamashalap jatyr. Bul týyndy ózime de, balalarǵa da, muǵalimderge de óte unady»,- dedi bilim berý ortalyǵynyń dırektory.

Sonymen qatar Rahat Ahmet aldaǵy ýaqytta otandyq týyndylardy jarnamalaý sharalarymen aınalysýdy josparlap otyrǵanyn jetkizdi.

«Balalarǵa bilim berý ortalyǵynda qyzmet etkennen keıin, eń aldymen, óskeleń urpaqqa patrıottyq tárbıe bergen óte mańyzdy dep esepteımin. Osy oraıda biz ulttyq qundylyqtarymyzǵa nazar aýdaryp jatyrmyz. Máselen, joǵary synyp oqýshylary arasynda Muhtar Áýezovti bilmeıtinder de bar. Árıne, bul jaǵdaı namysqa tımeı qoımaıdy. Sondyqtan bizdiń jumysymyzda «Tar zaman» fılmi de ózindik úlesin qosyp jatyr dep oılaımyn. Bolashaqta otandyq fılmderdi jáne ózge ónimderi  nasıhattaýdy qolǵa almaqpyz. Ázirge osy jumystyń tuǵyrnamasyn bekitip alǵandy pysyqtaýdamyz», - dep túıdi oıyn R. Ahmet.

Budan buryn habarlanǵandaı, Alash qaıratkerleriniń taǵdyryn arqaý etken «Tar zaman» telehıkaıasy 26 naýryzdan bastap «Qazaqstan» ulttyq arnasynda kórsetiletin boldy. Ol 14 epızodtan turady. Búgingi kúni atalmysh telehıkaıanyń yqshamdalǵan nusqasy fılm retinde kınoteatrlardan kórsetilip jatyr.

QazAqparattyń ıllıýstratsııasy