Qaraǵandyda oqýshylardyń selfıge táýeldiligi zertteldi
QARAǴANDY. QazAqparat - Qaraǵandyda pedagog-psıholog oqýshylarmen birge selfıdiń adamǵa áserin zerttedi, dep habarlady «QazAqparat» HAA tilshisi.
«Taqyryp óte ózekti. Ony balalardyń ózderi usyndy. Qazir adamdar jas ereksheligine qaramastan, ózderin sýretke túsirgendi unatatynyn kórip júrsizder ǵoı. Oqýshylarmen birge «Selfıdiń jasóspirimniń tulǵasyna áseri» taqyrybynda ǵylymı-zertteý jobasyn oryndadyq. Qalalyq deńgeıde ol - birinshi, oblys boıynsha úshinshi oryndy ıelendi», - dep aıtyp berdi Qaraǵandydaǵy № 30 orta mekteptiń pedagog-psıhology Ekaterına Ganına.
Onyń aıtýynsha, zertteý saýalnamasyna atalmysh mekteptiń 7-11 synyp aralyǵyndaǵy 100-ge jýyq oqýshysy qatysty.
«Aldymen, kim kúnine qansha ret, qaı qyrynan selfı jasaıtyndyǵyna qatysty saýalnama suraqtaryna jaýap alyndy. ıAǵnı selfıge táýeldiliktiń deńgeıin anyqtadyq. Úsh qyz tipti, kúnine ózderiniń 40-qa jýyq fotosyn jasaıtynyn kórsetti. Ol birneshe ret túsirilgen bir kadr bolýy da múmkin», - dedi ustaz.
Onymen qosa, synaq retinde selfıge táýeldi jetkinshekterdiń bıometrııalyq kórsetkishteri de ólshenip alynǵan. «Anyqtalǵandaı, sýretke túsý kezinde, ásirese qyzdardyń qysymy joǵarylap, dene qyzýy kóteriledi. Keıin keıbir qatysýshylar ózderine «selfıge sonshalyqty qumartýdyń qajeti bar ma, joq pa degen» suraqtar qoıa bastady. Zertteý qorytyndysy boıynsha, táýeldilikten qalaı arylýǵa bolatyndyǵyna qatysty psıhologııalyq usynymdar ázirlendi», - dep naqtylady E.Ganına.
