Qaraǵandyda oqýshy qyz shatyrdan sekirmek boldy
QARAǴANDY. QazAqparat –Qaraǵandy oblysy Shahtınsk qalasynyń polıtsııa qyzmetkerleri kópqabatty úıdiń shatyrynan sekirip ketpek bolǵan jasóspirimdi ólim aýzynan alyp qaldy, dep habarlady QazAqparat tilshisi.
3 naýryz kúni «102» telefonyna Shahtınsk qalasyndaǵy jalpy bilim beretin orta mekteptiń synyp jetekshisinen habarlama túsken. Muǵalim 14 jastaǵy mektep oqýshysy Jeńistiń 40 jyldyǵy kóshesindegi №58 úıdiń shatyrynda ózine-ózi qol jumsamaq bolyp turǵanǵanyn málimdegen.
«Polıtsııa bóliminiń jedel kezekshisi oqıǵa ornyna quramynda patrýldik polıtsııa rotasynyń qyzmetkerleri aǵa leıtenant Dýlat Sıtahmetov pen aǵa leıtenant Aıdos Ybyraev bar «01-10» avtopatrýlin jibergen. Olar sýıtsıdtiń aldyn alyp, qyz balany aman alyp qaldy», - dep habarlady Qaraǵandy oblysy Polıtsııa departamentiniń baspasóz qyzmetinen.
Anyqtalǵandaı, kámeletke tolmaǵan bala anasymen janjaldasqannan keıin osyndaı qadamǵa barǵan. Qazirgi ýaqytta onymen ıývenaldy polıtsııa qyzmetkerleri men psıholog jumys istep jatyr.
Aıta ketý kerek, eriktiler men qala turǵyndary áleýmettik jelide polıtsııaǵa batyl is-áreketteri úshin alǵystaryn bildirýde.
