Qaraǵandyda ógeı qyzyn zorlaǵan pedofıldiń úkimi ózgerissiz qaldy

QARAǴANDY. QazAqparat – Qaraǵandyda jarty jyldan astam ýaqyt boıy kámeletke tolmaǵan ógeı qyzyn zorlaǵan pedofıl sot úkimin ózgertýdi surady. Ol 12,5 jylǵa sottalǵan edi. Alaıda apellıatsııa alqasy sot sheshimin ádil dep taýyp, úkimdi ózgerissiz qaldyrdy, dep habarlaıdy QazAqparat tilshisi.

Qaraǵandy oblystyq soty birneshe aı boıy óziniń kámeletke tolmaǵan ógeı qyzyna qatysty júıeli túrde zorlyq-zombylyq jasaǵan er adamǵa qatysty Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń úkimin ózgerissiz qaldyrdy.

Jaqynda qylmystyq is apellıatsııa satysyna qorǵaý tarapynyń ony aqtaýdy suraǵan shaǵymy boıynsha kelip tústi.

Alaıda sot alqasy birinshi satydaǵy sottyń úkimin ózgerissiz qaldyrdy.

«Sot istiń mán-jaıyn durys anyqtady. 2019 jyldyń qańtar aıynan bastap 2019 jyldyń 27 tamyzyna deıin túngi ýaqytta M. 2004 jyly týǵan kámeletke tolmaǵan ógeı qyzynyń jatyn bólmesine júıeli túrde kelip, jynystyq sıpattaǵy zorlyq-zombylyq áreketterin jasaǵan.

Bul mán-jaı kámeletke tolmaǵan jábirlenýshiniń, onyń zańdy ókiliniń, kýálardyń aıǵaqtarymen, saraptama qorytyndysymen jáne istiń basqa da materıaldarymen rastalady.

Sot sottalǵan adamǵa jasalǵan quqyq buzýshylyqtyń qoǵamdyq qaýip sıpaty men dárejesin, onyń jeke basyn, qylmystyq jaýapkershilik pen jazany jeńildetetin mán-jaıdy eskere otyryp, jasalǵan áreketke mólsherles qylmystyq zań babynyń sanktsııasy sheginde jaza taǵaıyndady», - dep habarlady oblystyq sottyń baspasóz qyzmeti.

Sondaı-aq, sýdıa aıyptalýshynyń eki jas balasy bar ekenin eskerdi. Bul jaıtty sot qylmystyq jaýapkershilik pen jazany jeńildetetin sebep dep tanydy.

«M-nyń qylmystyq áreketi 2019 jyldyń tamyzynda aıaqtaldy jáne osy kezeńde QK 121-babynyń 3-bóliginiń 1-tarmaǵynyń 2-tarmaǵynyń sanktsııasy 12 jyldan 15 jylǵa deıin bas bostandyǵynan aıyrý túrindegi jazany qarastyrdy.

Jeńildetetin jáne aýyrlatatyn mán-jaı bolǵan kezde eń uzaq merzim 12 jyl 7 aı bas bostandyǵynan aıyrýdan (15 jyldan 3/4) aspaýy tıis.

Osylaısha, sot M-ǵa zańmen qarastyrylǵan eń qatal jazany taǵaıyndaǵan. Sot alqasy úkimdi buzýǵa nemese ózgertýge negiz bola alatyn materıaldyq jáne protsessýaldyq zańnyń talaptaryn buzý faktilerin anyqtamady», - dep tolyqtyrdy vedomstvonyń baspasóz qyzmeti.

Sot úkimi zańdy kúshine endi.