Qaraǵandyda oblystyq jyrshylar baıqaýy ótti
QARAǴANDY. QazAqparat – Bıyl Qaraǵandy qalasynda dástúrli jyr músháırasy «Buqarekeń jyrlaıdy» degen ataýmen Dostyq úıinde ótti. Atalmysh shara aqyn Doskeı Álimbaıdyń 170 jyldyǵyna oraılastyryldy, dep habarlaıdy QazAqparat tilshisi.
Jyl saıyn baıqaýǵa qatysýshylar sany artyp keledi. Bul joly dodaǵa 70-ten astam ótinim berildi. Óz ónerin jas jyrshylar da, aımaqtyń tanymal maıtalmandary da kórsetti.
«Qazaqtyń uly aqyny Buqar jyraýdyń tarıhy men shyǵarmalaryn barlyǵymyz bilýimiz kerek. Bizdiń paryzymyz - jastarǵa osyndaı uly tulǵalardyń tarıhyna degen súıispenshilik pen qyzyǵýshylyqty oıatý», - dedi mádenıet, arhıvter men qujattama basqarmasy basshysynyń orynbasary Erlan Neldibaev.
Saıys sharty boıynsha qatysýshylar qazaq aqyndarynyń kem degende 25 shyǵarmasyn jatqa bilýi kerek. Ádilqazylar alqasy qatysýshylardyń mánerlep oqýy jáne til baılyǵyn baǵalady.
«Buqar jyraý oqýlary» nomınatsııasynyń jeńimpazy Kerneı aýylynyń turǵyny Janerke Táshimbekova atandy. Novoýzenka aýylynyń ókili Vadım Gamm «Álemdi túgel bilse de» nomınatsııasynda birinshi boldy. Júldeli oryndy onymen Buqar Jyraý aýdanynyń turǵyny Doskeı Botpaı bólisti. Barlyq qatysýshylar gramotalarmen jáne alǵys hattarmen marapattaldy.
