Qaraǵandyda Nurany synap tunbalarynan tazartý máselesi qaraldy
QARAǴANDY. QazAqparat - Aımaqtyń ekologııalyq jaǵdaıy oblysynyń ákimdiginde talqyǵa tústi. Erlan Qoshanovqa Aqtoǵaı aýdanyndaǵy «Darıal-Ý», Temirtaýdaǵy «ArselorMıttal Temirtaý» AQ men «TEMK» AQ nysandaryndaǵy jaǵdaı týraly esep berildi, dep habarlaıdy óńir basshysynyń resmı saıty.
Aımaq basshysynyń tapsyrmasy boıynsha osy jyldyń basynda 2018-2020 jyldarǵa Temirtaýdaǵy ekologııalyq jaǵdaıdy jaqsartý boıynsha keshendik jospar qurylǵan bolatyn. Barlyǵy osy jylǵa 52 shara kózdelgen. Atalmysh jospar qalaı oryndalyp jatqany týraly tabıǵı resýrstar jáne tabıǵatty paıdalaný basqarmasynyń basshysy Rýslan Túlepbaev málimdedi.
- Búgingi tańda alty shara júzege asyryldy. 21- oryndalý barysynda. Taǵy 25 shara boıynsha jumystar 2018-shi jyldyń úshinshi toqsanyna josparlanǵan. Óndiristik ónerkásipterge 22 shara mindettelgen. Keshendik jospardy júzege asyrý únemi baqylaýda, aı saıyn monıtorıng júrgizip otyramyz, - dedi ol.
Kásiporyndar óz óndiris oshaqtaryn shyǵarylatyn zııandy qaldyqtardy tómendetý úshin jańǵyrtýda, sondaı-aq aǵashtar otyrǵyzyp jatyr.
Baıandamada Rýslan Túlepbaev Nura ózenin synap tunbalarynan tazartý boıynsha baǵdarlamaǵa egjeı-tegjeıli toqtalyp ketti. Kópquramdy ınvestıtsııalyq joba aımaǵymyzda 2004-shi jyldan beri júzege asyrylyp keledi. Osy ýaqyt aralyǵynda «Karbıd» zaýytynyń aýmaǵy, Nura ózeni men Jaýyr batpaǵynyń 4,6 shaqyrym túbi tazartyldy, qaldyqtardy kómetin polıgon salyndy. Buǵan qosa, qurylysy aıaqtalmaǵan Yntymaq sý toraby qaıta qalpyna keltirilip, Aqtóbe aýylynyń mańyndaǵy qorǵaý bógetiniń jáne Yntymaq sý qoımasyndaǵy shaǵyn gıdroelektr stantsııasynyń qurylysy aıaqtaldy.
Degenmen, «TEMK» AQ zararly kollektory burynǵydaı problemaly bolyp qalyp otyr. Bul máseleni sheshý úshin 2017 jyly kásiporyn esebinen óndiristiń aqpa sýyn tazartý jáne beıtaraptandyrý túıinin salýǵa jobalyq-smetalyq qujat qurylǵan bolatyn. Osylaısha óndiristik sýdy tazartyp zalalsyzdandyratyn bolady.
Jobany júzege asyrý úshin respýblıkalyq bıýdjetke 2019-2020 jyldarǵa ótinish jiberilgen.
Erlan Qoshanov ekologııa máselelerin únemi baqylaýdy ustap otyrýdy jáne ekologııalyq jaǵdaıdy jaqsartýǵa baǵyttalǵan Keshendik josparda qarastyrylǵan sharalardyń ýaqytynda ótkizilip otyrýyn qadaǵalaýdy tapsyrdy.
