Qaraǵandyda Naýryz meıramynda qaıyrymdylyq qory kópbalaly anaǵa páter syılady

QARAǴANDY. QazAqparat - Qaraǵandy qalasynyń barlyq aýdandarynda Naýryz meıramyna arnalǵan halyqtyq serýen ótip jatyr. Merekelik kontsert kezinde «Hareket» qaıyrymdylyq qory kópbalaly otbasyna páter kiltin tabys etti, dep habarlaıdy QazAqparat tilshisi.

«Hareket» qaıyrymdylyq qorynyń jumys istep kele jatqanyna nebári bir jyl boldy. Biraq osy ýaqyt aralyǵynda 82 otbasyn baspanamen qamtamasyz ete aldyq. Búgin de, mereke kúni Qaraǵandydan shyqqan kópbalaly anaǵa páter kiltin tabystaımyz», - deıdi Qaraǵandy oblysy boıynsha qaıyrymdylyq qorynyń ókili Aqtoty Júnisova.

Onyń aıtýynsha, alty balanyń anasy Ardaqtyń olarǵa qujattaryn tapsyrǵanyna bir apta ǵana ýaqyt ótken, al búgin Maıqudyq yqsham aýdanynda eki bólmeli páterdiń kiltin aldy.

«Úlken rahmet, men barlyǵyna jáne «Hareket» qoryna óte rızamyn. Men jesirmin, jalǵyz ózim alty balany asyrap otyrmyn. Úlken ulym 21, al kishi qyzym 9 jasta. Bes jyl buryn Qaraǵandyǵa kóship keldik, osy ýaqyt ishinde biz páter jaldap turdyq, óte qıyn boldy. Biraq búgin, Naýryz meıramynda maǵan tosynsyı jasady, páter kiltterin tabys etti, men óte qýanyshtymyn. Aıta ketetin jaıt, qazir Tuńǵysh Prezıdenttiń tapsyrmasy boıynsha men sııaqty kópbalaly analarǵa barlyq qajetti kómek kórsetile bastady. Bul úshin Elbasyna, jergilikti bılikke jáne osyndaı qaıyrymdylyq qorlaryna alǵysymdy bildiremin», - dedi kópbalaly ana Ardaq Jumabekova.

Ortalyq saıabaqta Naýryz merekesine qaraı 30 ekspozıtsııalyq kıiz úı men 20-ǵa jýyq saýda orny ornatyldy. Munda «sheberler qalasy» men altybaqan oryn tepken.

Oblystyq ólketaný murajaıy eki kıiz úıdi usyndy. Onda Uly dalanyń jeti qyryn beıneleıtin dástúrli qazaq qolóneri men jádigerlerin kórýge bolady.

Saıabaqta merekelik is-sharalar men kontsert jalǵasýda. Sahnada halyq ujymdary men Q. Baıjanov atyndaǵy kontserttik birlestiktiń ártisteri óner kórsetedi.

Esterińizge sala keteıik, Qaraǵandyda Naýryz meıramyn toılaý bir kúnmen shektelmeıdi. 25 naýryzǵa deıin qalada ulttyq sport túrleri boıynsha sporttyq jarystar, sándik-qoldanbaly óner buıymdarynyń kórmeleri, sulýlyq baıqaýlary, ulttyq taǵamdardy daıyndaý boıynsha otbasylyq saıystar ótedi.

Aýla klýbtarynda ashyq alańdarda merekelik kontsertter men ulttyq sporttyq saıystar uıymdastyryldy.