Qaraǵandyda Naýryz meıramy joǵary deńgeıde toılanyp jatyr
Oblys ákimi Erlan Qoshanov ta bolyp aımaqtyń barlyq turǵyndaryn meırammen quttyqtady.
- Halyq arasynda bul kúni barlyq ókpe men ashý artta qalyp, adamdar bir birine jaqyndasatyn kún dep aıtylady,- dedi Erlan Qoshanov óziniń quttyqtaý sózinde. - Naýryzdyń kópǵasyrlyq tarıhy tereńde jatyr. Qazaqstan úshin bul kún jyldyń basy, jańa bir bastama ispettes bolǵan. Biz barlyqtarymyz jańa jyl jańa baqyt pen ómirimizge jańashyldyqtar alyp keletinine senemiz. Bul Naýryz úlken oqıǵamen este qaldy, dálirek aıtar bolsaq Elbasynyń bes jańa áleýmettik bastamasy týraly aıtyp otyrmyn. Olardyń barlyǵy qatardaǵy qazaqstandyqtardyń áleýetiniń ósýine baǵyttalǵan. Bul bastamalar jańa belesterge, túbegeıli serpilisti áleýmettik jobalarǵa jol ashady. Qoljetimdi bolatyn baspanalar, jańa sapaly júıeli bilim, isin endi bastap kele jatqan kásipkerlerdi jappaı qoldaý, jáne eń bastysy, aımaǵymyzdyń ár turǵyny armandap kelgen joba - gaz qubyrynyń qurylysy. Ol oblysymyzdyń barlyq turǵyndarynyń ómirin jaqsartatyny haq. Men barlyqtaryńyzǵa Naýryzdan Naýryzǵa deın aman-esen jetip, baqytqa kenelýlerińizdi tileımin. Barlyq bastaǵan jobalarymyz abyroımen oryndalsyn degim keledi. Shyn júrekten osy kóktemniń jańarý merekesimen quttyqtaımyn, Qydyr ata ár shańyraqqa enip, baqyt syılasyn. Naýryz barlyǵymyzǵa beıbit ómir men jaqsylyq alyp kelip, elimiz kórkeıe bersin». 
Erlan Qoshanov mereke kúnine arnalyp tigilgen kıiz úılerdi aralap shyqty. Onda barlyq kelýshiler «Betashar», «Tusaý keser» ulttyq salt-dástúrlerdi tamashalaı alady. Ákim kirip shyqqan bir kıiz úılerdiń ishinde balalar «Toǵyzqumalaq» oıynynda baq talastyryp jatty.
Basty sahnada búgin kórermender nazaryna úlken merekelik kontsert usynyldy. Ártisterdiń ónerinen soń buqaralyq toı toılaý jalǵasyn tapty. Balalar atpen serýendep, búrkitter men tazy ıtterdi ustap sýretke túsý múmkindigine ıe boldy. Sonymen qatar bul kúni munda barlyq attraktsıondar da jumys istedi. 
Esterińizge sala keteıik, Naýryz meıramyn toılaý Qaraǵandyda 21-shi naýryzda bastaldy jáne 25-ne deıin jalǵasatyn bolady. Qala boıynsha bes alańda 30 kıiz úı tigildi: Ortalyq mádenıet jáne demalys saıabaǵynda, «Dostyq úıiniń» janynda, «Jańa Maıqudyq» MÚ, «Molodejnyı» MÚ jáne «Temirjolshylar» MÚ aldynda.
Foto: karaganda-region.gov.kz
