Qaraǵandyda Naýryz merekesine arnalǵan aıtys ótti

QARAǴANDY. QazAqparat – Kenshiler mádenıet saraıynda bolǵan «Armysyń, áz Naýryz» atty oblystyq aqyndar aıtysyna Nura, Jańaarqa, Shet aýdandarynan, sondaı-aq Qaraǵandy, Sátbaev, Temirtaý jáne Shahtınsk qalalarynan 12 jas aqyn qatysty, dep habarlaıdy QazAqparat tilshisi.

Aıta keter jaıt, bul óner saıysy lıngvıst-ǵalym jáne qoǵam qaıratkeri Ahmet Baıtursynulynyń 150 jyldyǵyna arnalyp otyr.

«Búgingi aıtystyń ereksheligi – Prezıdenttiń halyqqa Joldaýynda Ulytaý oblysynyń qurylǵany týraly jarııalaýy. Bul jańalyq ta shyǵarmashylyq baıqaýdyń basty taqyryptarynyń birine aınaldy. Aqyndar árqashan ózekti máselelerdi kóteredi. Mysaly, ótken jyly aqyndar Álıhan Bókeıhannyń aýdany nege joq ekendigin tilge tıek etken bolatyn», – deıdi atalmysh sharany júrgizýshi Aıtbaı Jumaǵulov.

Qazylar alqasynyń sheshimi boıynsha bas júldeni qaraǵandylyq Nursultan Rymbaı ıelendi. Birinshi orynda temirtaýlyq aqyn Erkeǵalı Bekbolat. Ekinshi oryndy Sátbaev qalasynan Mádı Oljabaı men Shahtınsk qalasynan Nurmuhamed Baısúgirov ózara bólisti. Úshinshi orynǵa qaraǵandylyqtar Tórehan Sovet pen Álıhan Nyǵmetolla, sondaı-aq Nura aýdanynan kelgen aqyn Jandos Baqytuly ıe boldy.

«Bul aıtysty baǵalaıtyn jáne túsinetin aqyndar men adamdar úshin úlken mereke. Qatysýshylardyń bári de myqty», – dep atap ótti nuralyq aqyn Jandos Baqytuly.

Sondaı-aq arnaıy syılyqtarmen qaraǵandylyq Dýman Samat, Jańaarqa aýdanynan Syrym Nyǵyzbaı jáne Shet aýdanynan Muhtar Ádilov marapattaldy.

«Men ózim Kókshetaýdyń týmasymyn, qazir Bóketov atyndaǵy QarÝ-de oqımyn. 2017 jyly Kókshetaýda Kóken Shákeıuly atyndaǵy aqyn mektebi ashylǵan kezde aıtysqa qyzyǵýshylyq tanyttym. Meniń alǵashqy ustazym – Muhamed Qońqaev, qazir meni Aıtbaı Jumaǵulov daıyndap jatyr. Kóptegen aqyndar biz úshin jastarǵa úlgi bola alady. Bireýi sóıleý ónerin, ekinshisinen akterlik sheberlikti jáne t. b. úırenedi», – deıdi Dýman Samat.

Aıtystyń barlyq qatysýshylary dıplomdarmen jáne alǵys hattarmen marapattaldy. Jeńimpazdarǵa aqshalaı syılyqtar tabys etildi.

Sondaı-aq, Qaraǵandyda oqýshylar arasynda «Jas tulpar» oblystyq aıtysy ótti.

Oǵan Buqar jyraý, Jańaarqa, Osakarov, Ulytaý, Shet aýdandarynan jáne Jezqazǵan men Prıozersk qalalarynan 10 oqýshy qatysty.

Jezqazǵan qalasynyń №10 JBBM onynshy synyp oqýshysy Aıaýlym Ámiráli úzdik atandy.