Qaraǵandyda naýqas jigit dárigerge qol jumsady
Áleýmettik jelilerde beınebaqylaý kamerasynan alynǵan vıdeo tarap ketti. Onda naýqastyń dárigerdi jaǵynan urǵany túsirilgen. Janjal Qaraǵandy qalasynyń H.J. Maqajanov atyndaǵy travmatologııa jáne ortopedııa oblystyq ortalyǵynda bolǵan. Vıdeoda er adam dárigerdi ıyǵynan qushaqtaıdy. Ol óz kezeginde jigittiń qolyn alyp tastaıdy. Alaıda naýqas bul áreketke ashýlanyp, dárigerdiń betinen ura bastaıdy.
Aýrýhanada dárigerge shabýyl jasaý faktisi boıynsha polıtsııa qylmystyq is qozǵady.
«Atalmysh fakt tirkeldi. Sot-medıtsınalyq saraptama taǵaıyndaldy. Tergeý júrip jatyr», - dep habarlady Qaraǵandy oblysy PD baspasóz qyzmeti.
Sonymen qatar bul jaǵdaıǵa qatysty densaýlyq saqtaý basqarmasy da málimdeme jasady.
«16 sáýirde professor H.J. Maqajanov atyndaǵy aýrýhananyń jaraqat pýnktine 1986 jyly týǵan er adam oń jaq qol aýmaǵyndaǵy ortasha aýyrsyný men isinýge shaǵymdanǵan. Naýqastyń aıtýynsha, ol saýsaǵyn qulap, jaraqattap alǵan. Tekserý nátıjesinde «oń qolynyń jabyq synyǵy» dıagnozy qoıylyp, bekitetin tańǵysh salynǵan. Osydan keıin patsıent súıektiń qaıta jyljýyna jol bermeý maqsatynda jedel emdeýge jiberildi. Alaıda naýqas gıps qoıýdan úzildi-kesildi bas tartty. Ol dóreki minez tanytyp, kezekshi travmatologqa dene jaraqatyn saldy», - dep habarlady vedomstvodan.
Zardap shekken dáriger quqyq buzýshyny keshirmeıtinin aıtyp, zańǵa saı jazalanýyn talap etpekshi.