Qaraǵandyda múmkindigi shekteýli jandarǵa arnalǵan «Jan shýaǵy» festıvali ótti
ASTANA. QazAqparat - Qaraǵandydaǵy Kenshiler mádenıet saraıynda múmkindigi shekteýli jandarǵa arnalǵan «Jan shýaǵy» HH oblystyq festıvali ótti, dep habarlaıdy oblys ákimdiginiń resmı saıty.
Festıvaldiń basty maqsaty - densaýlyǵyna baılanysty múmkindigi shekteýli jandardy áleýmettik mádenı ońaltý jáne beıimdeýge kómek kórsetý, sonymen qatar qoǵamnyń nazaryn múgedekterdiń problemalaryna aýdarý. 
Mamyr aıynan bastap qyrkúıekke deıin Qaraǵandy oblysynyń qalalarynda «Jan shýaǵy» jáne «Biz turatyn úı» degen ataýmen shyǵarmashylyq ujymdardyń eseptik kontsertteri, irikteý kezeńderi, sondaı-aq mamandandyrylǵan kásiporyndar, uıymdar, mektep-ınternattar, múgedekter men ardagerlerge arnalǵan ınternat úılerdiń qyzmetkerleri úshin qaıyrymdylyq kontsertteri ótkizildi.
Festıvaldiń oblystyq kezeńi barysynda Kenshiler mádenıet saraıynyń kireberisinde «Meniń áýes álemim» atty kórme ornalastyryldy. Onda 100-den astam sýretshiler, fotograftar jáne sándik-qoldanbaly óner sheberleriniń jumystary jınaqtalǵan.
«Mereıtoıyńmen, festıval!» gala-kontsertine 200-den astam adam qatysty. Sahnada shyǵarmashylyq ujymdar men mamandandyrylǵan mádenıet kásiporyndary, psıhonevrologııalyq medıko-áleýmettik mekemelerdiń, Qaraǵandy oblysy múgedekter qoǵamynyń erikti qoǵamdyq uıymdarynyń oryndaýshylary óner kórsetti. Festıvalge qatysýshylar Qaraǵandy, Temirtaý, Jezqazǵan, Balqash, Saran, Shahtınsk jáne Abaı qalalarynan jınaldy.
«Jan shýaǵy» - «Tvorchestvo dýshı» festıvali múmkindigi shekteýli jandardyń júreginde jylýlyq pen súıispenshilik týdyratyn erekshe jarqyn oqıǵaǵa aınalǵan,- deıdi uıymdastyrýshylar.
Alǵash ret festıval 1992-shi jyly oblystyq saýyqtyrý jáne halyq shyǵarmashylyǵy ǵylymı-ádistemelik ortalyǵynyń bastamasymen ótken bolatyn.
