Qaraǵandyda múmkindigi shekteýli jandarǵa alǵash ret qoǵamdyq syılyq tabys etildi
QARAǴANDY. QazAqparat - Qaraǵandyda «Jan Dos» qoǵamdyq birlestiginiń bastamasymen múmkindigi shekteýli adamdardyń jetistikteri úshin ataýly syılyq taǵaıyndaldy, dep habarlaıdy QazAqparat tilshisi.
Marapattaý rásimi K. Stanıslavskıı atyndaǵy teatr ǵımaratynda ótti. Shara Halyqaralyq múgedekter kúnine oraılastyryldy.
«Bizdiń baıqaýdyń maqsaty – múgedektigi bar adamdardy qoǵamdyq qyzmetke yntalandyrý. Qoǵamnyń qol jetkizgen jetistikterin kórgenin jáne osy mysaldar basqalardy jańa jetistikterge shabyttandyrǵanyn qalaımyz», - dedi «Jan Dos» QB quryltaıshysy Syrym Aǵubaev.
Syılyqty tek belgili bir jetistikterge jetken múmkindigi shekteýli azamattardy ǵana emes, sonymen qatar olarǵa kómektesetin jandarǵa da tabys etý týraly sheshim qabyldandy.
Baıqaýǵa 60-tan astam ótinim tústi. Laýreattardy qoǵamdyq jáne memlekettik qyzmetkerlerden quralǵan komıssııa tańdady.
Teatr hollynda múmkindigi shekteýli adamdar daıyndaǵan jumystardyń kórmesi usynyldy. Marapattaý rásimine máslıhat depýtattary, memlekettik organdardyń, Nur Otan partııasynyń, úkimettik emes uıymdardyń ókilderi qatysty.
Laýreattar músinsheler men dıplomdar, aqshalaı jáne baǵaly syılyqtar aldy.
Uıymdastyrýshylardyń aıtýynsha, «Jan Dos» qoǵamdyq syılyǵy jyl saıyn ótetin bolady.
«Jan Dos» syılyǵynyń alǵashqy ıegerleri:
Meıirim Orynbaev, MEIIRIM ońaltý ortalyǵynyń jetekshisi, «Ǵıbrat» jastar densaýlyq ortalyǵynyń qyzmetkeri – «múmkindigi shekteýli adamdardyń qoǵamdyq qyzmet salasyndaǵy úzdik jetistikteri úshin»;
Káripbek Kúıikov – «múmkindigi shekteýli adamdardyń qoldanbaly óner salasyndaǵy jetistikteri úshin»;
Birjan Ábjanov – «vokaldyq oryndaý salasyndaǵy múmkindigi shekteýli adamdardyń úzdik jetistikteri úshin»;
Natalıa Zvıagıntseva – «múmkindigi shekteýli adamdardyń sport salasyndaǵy jetistikteri úshin»;
Vıktorııa Tıtova - «múmkindigi shekteýli adamdardyń mádenıet salasyndaǵy jetistikteri úshin»;
Aıdana Nurtazına – «arbada bıleý salasyndaǵy múmkindigi shekteýli adamdardyń jetistikteri úshin»;
Tańsáýle Serikov, QarMTÝ qyzmetkeri – «belsendi eńbek qyzmeti úshin»;
Tatıana Golovchenko, sýrdoaýdarmashy jáne pedagog – «múgedektigi bar adamdardyń ómir súrý sapasyn jaqsartýǵa qosqan úlesi úshin»;
Valerııa Nefedova, kásipker – «múmkindigi shekteýli adamdarǵa meıirimdi qarym-qatynasy úshin»;
Svetlana Sbrodova, oblystyq «Indýstrıalnaıa Karaganda» gazetiniń tilshisi – «erekshe qajettilikteri bar adamdardyń ómirin BAQ-ta úzdik jarııalaǵany úshin».
Halyqaralyq múgedekter kúnin Birikken Ulttar Uıymynyń Bas Assambleıasy (BUU BA) 1992 jyldyń 14 qazanynda jarııalaǵan jáne jyl saıyn bul mereke 3 jeltoqsanda atalyp ótedi. Bul kúni Assambleıa BUU-ǵa múshe memleketterdi múgedekterdiń qoǵam ómirine odan ári kirigýine baǵyttalǵan is-sharalardy ótkizýge shaqyrdy.
