Qaraǵandyda múmkindigi shekteýli jandardyń kómekshilerine ótemaqy tólenetin boldy
Raısa Korıakına osydan 6 jyl buryn júıke syrqatynan keıin 1-shi toptaǵy múgedekter sanatyna ótken. Saldarynan jylyna birneshe márte ońaltýdan ótip turýy kerek. Denesiniń jartysyna jýyǵynyń qımyl-áreketi qıyndyq týdyrǵandyqtan kómekshi aýadaı qajet. Biraq, osyǵan deıin olardyń qyzmeti tólenbeıtin edi.
«Jolda jalǵyz ózime júrý óte qıyn. Kıim salynǵan, kerek zattar salynǵan chemodan bar, ony kóterip júrý kerek. Tipti poıyzda kýpege otyrsań da tósegińdi óz erkińmen sala almaısyń. Kúniń basqa adamǵa qaraǵannan keıin jaǵdaıyń da túsinikti ǵoı. Bir qolymmen eshteńe isteı almaıtynmyn. Endi kómekshimdi alyp júretin múmkindik týdy. Bul óte úlken kómek», - deıdi Raısa Korıakına.
Atap ótken jón, kómekshige beriletin ótemaqy pılottyq joba retinde tek Pavlodar, Nur-Sultan jáne Qaraǵandy qalalarynda ǵana júzege asady. Ózge óńirlerge engizý úshin qoldanystaǵy zań ózgerýi tıis. Mysaly bıyl 33 kómekshi shamamen 5 mln. teńge kóleminde tıisti qarjysyn alǵan.
«Bıylǵy jyldan bastap eńbek jáne halyqty áleýmettik qorǵaý mınıstrligi usynysymen depýtattar bekite otyryp, múgedektigi bar balalardyń ata-anasyna kýrorttyq-sanatorııanyń 70 paıyzyn óteý jónindegi zańyna tıisti ózgeris engizildi. Al, 1-top múgedekterine tıisti ózgertý engizilgen joq. Biraq, tıisti usynystar jiberilgen bolatyn», - dep atap ótti Qaraǵandy oblysy jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Ermek Núkisov.
Buryn ońaltýǵa barý úshin 2 márte medıtsınalyq kýálandyrýdan ótý kerek bolǵan. Osy kezde barmaq basty, kóz qysty áreketter kóbeıgen. Mysaly Qaraǵandy oblysynda sońǵy 5 jylda halyqty áleýmettik qorǵaý salasynda 25 qylmystyq is qozǵalǵan. Saldarynan 11 adam jaýapkershilikke tartylǵan.
«Negizinen qylmystyq istiń barlyǵy múgedekterge grýppa berý máselesi, sozý máselesi boıynsha anyqtalǵan. Qaraǵandy oblysy boıynsha eńbek departamenti qyzmetkerleri tipten múgedekterdiń merzimin zańsyz sozyp, 200 myń teńgege deıin zańsyz syıaqy alǵan», - dep málimdedi Qaraǵandy oblysy sybaılas jemqorlyqqa qarsy is-qımyl agenttiginiń departament basshysynyń orynbasary Arslan Myńǵyshev.
Ótken jyly 117 birinshi toptaǵy múmkindigi shekteýli jandardyń kómekshisine áleýmettik kómek kórsetilgen. Sondaı-aq múgedektigi bar 21 balanyń ata-anasyna kómek berilgen. Onyń jalpy somasy 14 mıllıon teńgeni quraǵan. Oblysta 24 myńǵa jýyq erekshe kútimdi qajet etetin adam turady.