Qaraǵandyda múmkindigi shekteýli balalarǵa arnalǵan tegin sport sektsııalary ashyldy

QARAǴANDY. QazAqparat - Qaraǵandy «Teń múmkindikter álemi» qoǵamdyq qory iske asyryp jatqan «Salamatty bolashaq» áleýmettik jobasyna qosyldy, dep habarlaıdy QazAqparat.

Atalmysh joba aıasynda erekshe balalar sportpen tegin aınalysa alady. Adaptıvti taekvondo men júzý, ınklıýzıvti horeografııa sektsııalary ashyldy. Bochche boıynsha jattyǵýlar ótkiziledi – bul Qazaqstandaǵy jańa paralımpıadalyq sport túri.

Jobanyń tusaýkeseri balalar men jasóspirimder saraıynda ótti. Yntymaqtastyq týraly memorandýmǵa Qaraǵandy oblysy ákiminiń orynbasary Abzal Núkenov jáne «Teń múmkindikter álemi» QQ dırektory Nurgúl Úljekova qol qoıdy.

- Biz birlese jumys isteımiz jáne balalarǵa ózin-ózi tanytyp, tilekterin oryndaýǵa jáne óz armanyna jetýge kómektesemiz. Bul joba erekshe balalardy áleýmettendirýge kóbirek múmkindik beredi, - dedi Abzal Núkenov.

Bul kúni Bochche jáne beıimdelgish júzý boıynsha ashyq jattyǵýlar ótti.

Qaraǵandydaǵy joba úılestirýshisi Gaýhar Ákijanovanyń aıtýynsha, baǵdarlamaǵa qatysý úshin toptar qazirdiń ózinde qurylyp qoıǵan, biraq rezerv bolýy múmkin.

Bochche sektsııasy №27 jalpy bilim beretin mektepte jáne tirek-qımyl apparaty buzylǵan balalarǵa arnalǵan oblystyq mektep-ınternatta jumys isteıtin bolady. Adaptıvti taekvondo sektsııasy oblystyq taekvondo WTF Federatsııasynyń qatysýymen uıymdastyrylǵan. Inklıýzıvti horeografııa sabaqtary Dostyq úıinde ótkiziledi.

- Erekshe qajettilikteri bar balalar úshin qozǵalys belsendiligi mańyzdy. Bul, eń aldymen, az qımyldaýǵa baılanysty qaıtalama asqynýlardyń aldyn alý bolyp tabylady. Beıimdelgish sportpen júıeli túrde aınalysý arqyly balalardyń dene jáne qarym-qatynas qabiletteri jaqsarady, - dep atap ótti Nurgúl Úljekova. - Biz Qaraǵandy oblysy ákimdiginiń qyzyǵýshylyq tanytyp, qoldaý kórsetkenine qýanyshtymyz.

Qor jattyqtyrýshylardy oqytý, eńbekaqy tóleý, ádistemelik súıemeldeý jáne arnaıy sporttyq quraldarmen jaraqtandyrý jónindegi shyǵystardy óz moınyna alady.

- Meniń ulym úsh jasynan bastap júzýmen aınalysady. Bochche sektsııasyna jazyldy. Men mundaı oıyn týraly buryn bilmedim. Internette oqydym, maǵan unady. Bul múgedekter arbasyna tańylǵan balalar úshin óte qolaıly. Qarym-qatynas jasaýdyń qosymsha múmkindikteri, - dep bólisti 6 jasar erekshe balanyń anasy Tatıana Sokovyh.

«Salamatty bolashaq» jobasy 2017 jyldan bastap jumys isteıdi. Elordada bastaý alyp, geografııasyn birtindep keńeıtýde. Qazir Nur-Sultan, Pavlodar, Shymkent jáne Qaraǵandy oblystarynda sporttyq sektsııalar jumys isteıdi.

Joba jergilikti atqarýshy organdarmen yntymaqtastyqta júzege asyrylady. Bas seriktes – Samruk-Kazyna Trust áleýmettik jobalardy damytý qory. Áleýmettik seriktester – Nur Otan partııasy («Kedergisiz keleshek - Býdýşee bez barerov» jobasy aıasynda) jáne Batyl Jureq qaıyrymdylyq qory.

Jobaǵa qatysý týraly suraqtarmen kelesi telefon nómiri arqyly habarlasyp, bilýge bolady: [phone].