Qaraǵandyda múmkindigi shekteýli balalardan fýtbol quramasy quryldy
QARAǴANDY. QazAqparat - Qaraǵandyda múmkindigi shekteýli balalar arasynda fýtboldan oblys qurama komandasy jasaqtalýda.
Tirek-qımyl apparaty buzylǵan balalarǵa arnalǵan mamandandyrylǵan mektep-ınternatta eki aı boıyna jattyǵýlar ótip jatyr, dep habarlaıdy QazAqparat tilshisi.
Qazirgi tańda fýtbol komandasynda mekteptiń 30 tárbıelenýshisi oınaıdy. Quramada 9-14 jas aralyǵyndaǵy balalar óner kórsetedi. Barlyq jattyqtyrýshylar Almaty qalasynda erekshe qajettilikteri bar balalarmen jumys isteý boıynsha arnaıy daıyndyqtan ótti. Jattyǵý sabaqtary aptasyna eki ret ótedi.
«Jattyǵýlar balalarǵa oń áser etýde, bul birden baıqalady. Biz, bapkerler, olardan jaqsy qýat alamyz. Balalardyń jattyǵýlardy qalaı kútetinin, olardyń qalaı qýanatynyn jáne tyrysatynyn kórip otyrmyz», - deıdi bapker Evgenıı Sveshnıkov.
Mamandandyrylǵan mektep-ınternatynyń tárbıelenýshileri úshin sabaqtar balalar fýtbolyn damytý boıynsha pılottyq joba aıasynda uıymdastyrlyp otyr. Ótken jyldyń qazan aıynda «Nur Otan» partııasy, Qazaqstan jáne Qaraǵandy oblysynyń fýtbol federatsııalary, sport basqarmasy jáne «Shahter» FK arasynda memorandýmǵa qol qoıylǵan bolatyn. Qarasha aıynan jeltoqsan aıyna deıin jattyqtyrýshylar arnaıy kýrstardan ótti, sodan keıin balalar úshin formalar men doptar satyp alyndy. Jattyǵýlarǵa osy jyldyń sáýir aıynda kirisip ketti.
«Qazir Qaraǵandy oblysynyń quramasy jasaqtalýda. Aldaǵy ýaqytta fýtbol federatsııasy ár óńirden kelgen komandalar arasynda chempıonattar ótkizip, oǵan bizdiń oblys ta qatysatyn bolady», - dedi dene shynyqtyrý jáne sport basqarmasynyń basshysy Dmıtrıı Karpov.
Osyǵan uqsas baǵdarlama Almaty men Pavlodar oblysynda jumys isteıdi.
