Qaraǵandyda monshadan shyqqan órt eki saǵatqa jýyq sóndirildi
QARAǴANDY. QazAqparat – Qaraǵandy oblysynda aǵashtan turǵyzylǵan monsha janyp ketti, dep habarlaıdy QazAqparat tilshisi.
Órt sóndirýshiler tilsiz jaýmen eki saǵat kúresti.
20 maýsym kúni saǵat 18:39-da Qaraǵandy qalasynyń Buqar Jyraý dańǵylynda ornalasqan saýnalardyń birinde órt shyqqany týraly habar túsken. Oqıǵa ornyna kelgende órt sóndirýshiler jeke turǵan bir qabatty aǵash monsha janyp jatqanyn anyqtaǵan.
«Órt 250 sharshy metr aýmaqty sharpydy. Zardap shekkender men qurban bolǵandar joq», - dep habarlady Qaraǵandy oblystyq Tótenshe jaǵdaılar departamentiniń baspasóz qyzmetinen.
Órtti sóndirýge TJD 45 qyzmetkeri men 11 tehnıkasy jumyldyryldy. Jalyn 20:19-da oqshaýlandyrylyp, 20:31-de tolyǵymen sóndirildi.
