Qaraǵandyda mıkroqarjy uıymyn tonady degen kúdiktiler Astanada ustaldy

QARAǴANDY. QazAqparat – Qaraǵandyda mıkroqarjy uıymyna qaraqshylyq shabýyl jasaǵan eki er adam Astana qalasynda ustaldy, dep habarlaıdy QazAqparat Rolisia.kz-ke silteme jasap.

5 mamyr kúni saǵat 18:00 shamasynda Qaraǵandy qalalyq polıtsııa basqarmasyna qarasty Ońtústik-Shyǵys polıtsııa bóliminiń kezekshi bólimine habarlama túsken. Onda belgisiz eki adam shaǵyn nesıe berý uıymyna bas kóktep kirgeni, 30 jastaǵy menedjer áıeldi tapanshaǵa uqsas zatpen qorqytyp, kassadan 1 mln 29 myń teńge alyp ketkeni týraly aıtylǵan.

Atalǵan derekke qatysty QR Qylmystyq kodeksiniń 192-baby 2-bóligine sáıkes qylmystyq is tirkeldi.

«Aýyr qylmysty ashý maqsatynda departament apparatynyń krımınaldyq polıtsııasynyń, sondaı-aq Qaraǵandy qalalyq polıtsııa basqarmasynyń jáne onyń aýmaqtyq polıtsııa bólimderiniń tájirıbeli qyzmetkerlerinen jedel-izdestirý toby quryldy. 7 mamyr kúni júrgizilgen keshendi is-sharalar barysynda Astana qalasynda kúdiktiler – 23 jáne 25 jastaǵy eki er adam ustaldy. Aıǵaq zattar tárkilendi», - dep habarlady Qaraǵandy oblystyq Polıtsııa departamenti bastyǵynyń orynbasary Ábil Ábildın.

Kúdiktiler ýaqytsha ustaý ızolıatoryna qamaldy. Qylmystyq kodekstiń sanktsııasyna sáıkes, ustalǵandarǵa bes jyldan on jylǵa deıin bas bostandyǵynan aıyrý jazasy kózdelgen.