Qaraǵandyda meıramhanaǵa kelýshiler arasynda jappaı tóbeles boldy
QARAǴANDY. QazAqparat –Qaraǵandy qalasynda oıyn-saýyq mekemesi jabylǵannan keıin kelýshiler arasynda jappaı tóbeles boldy. Saldarynan úsh adam aýrýhanaǵa tústi, dep habarlaıdy QazAqparat tilshisi.
Búgin tún ortasynda Qaraǵandydaǵy meıramhanalardyń biriniń janynda mekeme jabylǵannan keıin kelýshiler arasynda janjal bastalǵan. Oqıǵaǵa kýá bolǵandardyń aıtýynsha, daý-damaı oryn alǵan jerde ondaǵan adam bolǵan. Tóbeleske qatysqan onnan astam adamdy tártip saqshylary ustap, alyp ketken.
Polıtsııa departamentiniń baspasóz qyzmeti bul oqıǵa boıynsha qylmystyq is tirkelgenin habarlady.
«25 qazan kúni tún ortasynda Qaraǵandy qalasynyń oıyn-saýyq mekemesiniń janynda, ol jabylǵannan keıin, dalada mas adamdar arasynda janjal paıda boldy.
Qaraǵandy oblysy Polıtsııa departamentiniń jedel kezekshisi oqıǵa ornyna patrýldik polıtsııa polkiniń jaqyn mańdaǵy barlyq ekıpajyn jiberdi.
Demalys kúnderi túngi narıadtar kúsheıtildi, polıtsııa qyzmetkerleriniń is-áreketteriniń arqasynda oqıǵaǵa qatysýshylar izin sýytpaı ustalyp, polıtsııa bólimine jetkizildi. Úsh adam jaraqat alyp, medıtsınalyq mekemege jetkizildi. Mán-jaılar anyqtalýda.
Atalǵan fakti boıynsha QR QK 293-baby 3-bóligi boıynsha qylmystyq is tirkeldi. Tergeý júrip jatyr», - dep habarlady oblystyq Polıtsııa departamentinen.
Málim bolǵandaı, zardap shegýshilerdiń birine ota jasaldy.
«Naýqas túnde jetkizildi, oǵan ota jasaldy. Zardap shekken azamatta baýyrdyń sol jaq bóliginiń zaqymdalýymen ish qýysyna enetin pyshaq jaraqaty boldy. Jaǵdaıy turaqty, hırýrgııa bóliminde jatyr», - dep túsindirdi oblystyq Densaýlyq saqtaý basqarmasynyń baspasóz qyzmetinen.
