Qaraǵandyda merziminen buryn bosatylǵan buzaqy qaıta túrmege qamaldy
QARAǴANDY. QazAqparat - 38 jastaǵy qaraǵandylyq shartty túrde merziminen buryn bosatý erejesin buzǵany úshin qaıtadan temir tordyń ar jaǵyna oraldy, dep habarlaıdy QazAqparat tilshisi.
«Quqyqtyq tártip» jedel-aldyn alý is-sharasy kezinde Qaraǵandy qalasynyń Ońtústik-Shyǵys polıtsııa bóliminiń ýchaskelik polıtsııa ınspektorlary «bas bostandyǵynan aıyrý oryndarynan merziminen buryn shartty túrde bosatylǵan» azamattyń tártip buzǵanyn anyqtaǵan.
Tártip saqshylarynyń qadaǵalaýynda bolǵanyna qaramastan, túrmeden merziminen buryn bosatylǵan 38 jasar qaraǵandylyq ákimshilik zańnamanyń normalaryn birneshe ret buzǵan. Spırttik ishimdik iship, jubaıyn soqqyǵa jyqqan. Sondaı-aq, buzaqy áreketterimen kórshileriniń mazasyn alǵan.
Tergeý barysynda «shartty túrde bosatylǵan azamatqa» qatysty ákimshilik jaza qoldanylǵan. Ol azdaı, «Turmystyq zorlyq-zombylyqtyń aldyn alý týraly» QR Zańynyń 20-babyna sáıkes qorǵaý uıǵarymy shyǵarylǵan. Alaıda, bul áreketter buzaqynyń durys jolǵa túsýine esh áser etpegen. Ýchaskelik polıtsııa ınspektorlarynyń birneshe ret eskertkenine qaramastan, ol tártip buzýyn jalǵastyra bergen.
Nátıjesinde QR Qylmystyq Kodeksi 72-babynyń 7-tarmaǵyna sáıkes, 38 jastaǵy azamatqa qatysty Qaraǵandy qalasy Ońtústik-Shyǵys polıtsııa bóliminiń qyzmetkerleri shartty túrde merziminen buryn bosatýdyń kúshin joıý týraly usynys joldady. Onyń qorytyndysy boıynsha 2019 jylǵy 13 naýryzda Qaraǵandy qalasy Qazybek bı aýdanynyń soty usynysty qanaǵattandyryp, jazanyń ótelmegen bóligin, ıaǵnı 3 jyl 7 aı 20 kúndi ol qylmystyq-atqarý júıesi mekemelerinde ótkizý týraly qaýly shyǵardy.
Qaraǵandy qalasynyń Ońtústik-Shyǵys sektorynda búgingi tańda «bas bostandyǵynan aıyrý oryndarynan merziminen buryn shartty túrde bosatylǵan adamdar» sanaty boıynsha profılaktıkalyq esepte 40 adam tirkeýde tur.
