Qaraǵandyda Merýert Ótekeshovanyń mereıtoıyna arnalǵan kórme ashyldy
QARAǴANDY. QazAqparat – N. V. Gogol atyndaǵy Qaraǵandy oblystyq ámbebap ǵylymı kitaphanasynda tanymal qazaqstandyq jáne keńestik teatr jáne kıno aktrısasy Merýert Ótekeshovaǵa arnalǵan kórme ótýde. Ol qazaqstandyq kınonyń jaýhary dep tanylǵan «Qyz Jibek» kınoepopeıasymen tanymal boldy, dep habarlaıdy QazAqparat tilshisi.
Jubaıy Quman Tastanbekovpen birge Merýert Ótekeshova «Shoqan Ýálıhanov», «Aıdahar jyly», «Provıntsııalyq roman» fılmderinde túsken.
Ekspozıtsııany óner ádebıeti bólimi uıymdastyrdy. Kórme 25 aqpanda aıaqtalady. Bul kún kezdeısoq tańdalǵan joq. Dál sol kúni aktrısa 70 jasqa tolady.
«Qyz Jibek» fılmi týraly kitaptar oqyrmandar arasynda úlken suranysqa ıe. Olardyń negizinde referattar jazady, beıne prezentatsııalar jasaıdy. Aktrısa Merýert Ótekeshovanyń dańqy jyldar óte kele asqaqtaı túsýde. Biz ótken jyly osyndaı kórme ótkizýdi josparlaǵan bolatynbyz», - deıdi óner ádebıeti bóliminiń basshysy Baljan Ospanqulova.
Onyń aıtýynsha, Merýert Ótekeshova Qaraǵandy onyń súıikti qalalarynyń biri ekenin birneshe ret aıtqan. Baljan Ospanqulovanyń jeke muraǵatynda aktrısamen baılanysty sırek kezdesetin fotosýret saqtalǵan. 70-shi jyldardyń ortasynda túsirilgen sýrette Kent taýlarynyń fonynda akter Ýaıs Sultanǵazın, kitaphana qyzmetkeriniń ákesi men aǵasy jáne Merýert Ótekeshova beınelengen.
«Sol kezderi ataqty akterler jıi shalǵaıdaǵy eldi mekenderdi aralaıtyn. Bizdiń sovhoz bolǵan kezde men kishkentaı edim. Frýnze (qazir bul aýyl «Amanjolov» atyndaǵy) atyndaǵy aýylǵa M. Áýezov atyndaǵy Qazaq akademııalyq drama teatrynyń trýppasy keldi. «Qozy Kórpesh-Baıan Sulý» pesasymen kelgeni esimde. Jaqyn mańdaǵy sovhozdardan da kóptegen adamdar jınaldy», - dep eske alady Baljan Ospanqulova.
Osy sýretten basqa, kórmede Muhtar Ótebaevtyń dombyrasynda oryndalǵan jáne Farıda Sháripovanyń oqyǵan óleńderi jazylǵan vınıldi plastınka, «Qazaqstan kınosynyń antologııasy» CD-dıskisi usynyldy. «Qyz Jibek» eposynyń basylymdary, Ǵabıt Músirepov pen Gúlfaırýs Ismaılovanyń eńbekteri kóptegen kitaptar men jýrnaldardy qamtıdy. Onyń ishinde sırek kitaptar arasynda «Qazaqstan kınosy» da bar. Basylym 2003 jyly Sh.Aımanov atyndaǵy «Qazaqfılmniń» tapsyrysymen jaryq kórdi.
Kitaphana qyzmetkerleri Merýert Ótekeshovamen onyń qatysýymen tikeleı efır ótkizý jóninde kelissózder júrgizýde. Naqty kúni týraly keıinirek áleýmettik jelilerde habarlanady.
