Qaraǵandyda «Mereıli otbasy» baıqaýynyń oblystyq kezeńiniń jeńimpazdary anyqtaldy

QARAǴANDY. QazAqparat - Qaraǵandyda «Mereıli otbasy» respýblıkalyq baıqaýynyń oblystyq kezeńi ótti. Oǵan óńirdiń barlyq qalalary men aýdandarynan 19 otbasy qatysty, dep habarlaıdy QazAqparat oblys ákiminiń baspasóz qyzmetine silteme jasap.

Oblystyq týrǵa óter aldynda qatysýshylar óńirlik kezeńderdegi jeńis úshin jarysty. Qazylar alqasynyń músheleri otbasy tarıhy men dástúrlerine, birneshe urpaqta belgili bir mamandyqty ustanýyna jáne otbasyndaǵy balalar sanyna nazar aýdardy.

«Maǵan osy baıqaýǵa ákimdik qyzmetkerleri qatysýǵa usynys jasady, sebebi men kópbalaly ákemin – meniń bes balam bar. Men ózim de on balanyń birimin, meniń ata-anamda 25 nemeresi bar, olardyń tegi Salqaýovtar. Portfolıo jınaý osynsha qyzyqty bolady dep kútpegen edim. Ol úshin qujattardy daıyndaý qyzyqty boldy. Men olardy eki apta boıy jınap, otbasy týraly kóptegen qyzyqty málimetterdi bildim. Men keı derekterdi bilmeppin, al keıbirin umytyp ta qalyppyn. Bul bir qyzyqty tájirıbe boldy. Barlyq týystarymyz jumyldy. Biz óz otbasymyzdyń tarıhyn balalarǵa aıtyp, ony bilý mańyzdy ekenin túsindik», - dedi Jezqazǵannan kelgen baıqaýǵa qatysýshy Qaırat Taǵambaev.
Aıta ketý kerek, oblystyq kezeńde otbasylardy irikteý ólshemsharttary aımaqtyq kezeńderdegideı bolyp qala berdi. Alaıda básekelestik aıtarlyqtaı joǵarylaı tústi.
Mysaly, Jezqazǵannan kelgen Stamqulovtar otbasynda - 11 bala, 33 nemere, 17 shóbere súıip otyr. Otaǵasy Álırahman Stamqulov 20 jyl mektep dırektory bolyp jumys istegen, «Qazaq SSR halyq aǵartý isiniń úzdigi» belgisimen marapattalǵan. Onyń jubaıy Roza Sekemanovanyń aıtýynsha, barlyq otbasy jıi bas qosady eken.
Baıqaýǵa Qaraǵandy qalasynyń tanymal otbasylary da qatysty. Mysaly, «Daryndy bala» jekemenshik balabaqshalar jelisiniń jáne «Daryndy Ana» kovorkıng-ortalyǵynyń negizin qalaýshy Aınagúl Hamıtovanyń januıasy. Bıznes hanym óz otbasyn maqtan tutady. Ol ózi bes balanyń anasy. Onyń atasy Tóleýhan Hamıtov – UOS batyry. Anasy Sánııa Hamıtova ómir boıy aýdandyq emhanada dáriger bolyp jumys istegen.
Baıqaýdyń oblystyq kezeńiniń qorytyndysy boıynsha úshinshi oryn Stamqulovtar otbasyna buıyrdy. Ekinshi orynda - Jezqazǵan qalasynyń Salqaýovtar otbasy. Respýblıkalyq komıssııanyń sheshimimen olar Nur-Sultanda ótetin baıqaýdyń aqtyq saıysynda Qaraǵandy oblysyn tanystyratyn bolady.
«Biz fınalǵa tolyq daıynbyz. Qazir oblystyq kezeńde barlyq otbasymyz tolyq jınalǵan joq. Qaryndasym men kelinim jýyrda bosanyp, munda kele almady. Biraq respýblıkalyq kezeńge barlyǵy kelip, zaldyń kóp bóligin alamyz, otbasymyz shyn máninde úlken!» – deıdi Qaırat Taǵambaev.
Oblystyq kezeńde birinshi oryndy Hamıtovtar otbasy ıelendi.
Barlyq qatysýshylar estelik marapattarǵa ıe boldy. Jeńimpaz atanǵan Hamıtovtar otbasyna 10 kúnge «Jartas» shıpajaıyna joldama berildi.