Qaraǵandyda memlekettik jáne jekemenshik balabaqshalardyń baǵasy teńestirildi
ASTANA. QazAqparat - Qaraǵandyda endi memlekettik jáne jekemenshik balabaqshalardyń baǵasy birdeı bolady. Ol memlekettik tapsyrys somasyn ulǵaıtý arqyly múmkin bolyp otyr, dep habarlaıdy oblystyq ákimdiktiń baspasóz qyzmeti.
Bir bala úshin memleket 26000 teńge tólep otyratyn bolady. Osylaısha, ata-analarǵa tek onyń aıyrmashylyǵyn, ıaǵnı 11000 teńgeni tólep otyrý kerek. Al osyǵan deıin memlekettik tapsyrys somasy 17 000 teńge bolatyn.
- Biz bul máseleni burynnan qarastyryp kelemiz,, - dedi qala ákimi Nurlan Áýbákirov. - Endi, mine, birinshi maýsymnan bastap, jekemenshik balabaqshalardaǵy memlekettik tapsyrys somasyn ulǵaıtyp otyrmyz. Ol úshin bizdiń depýtattar men qoǵamdyq keńes músheleri daýys berdi.
Osyndaı sharalardyń kómegimen qala ákimdigi 2018 jyldyń sońyna deıin úsh jastan alty jasqa deıingi barlyq balalardy balabaqshaǵa ornalastyrýdy josparlap otyr. Búgingi tańda Qaraǵandyda mektepke deıingi mekemelerge kezekte 6200 bala tur.
- Memlekettik bıýdjet úshin memlekettik tapsyrysty jańa balabaqsha qurylysyna jumsaǵansha jekemenshik balabaqshalarǵa baǵyttaǵan anaǵurlym tıimdirek, - dedi Nurlan Áýbákirov. - 300 oryndyq jańa balabaqsha salý úshin kem degende 800 mıllıon teńge qajet. Al myńnan asa balany memlekettik tapsyrys sheńberinde jekemenshik mektepke deıingi mekemege ornalastyrýǵa 500 mıllıonan asa qarjy kerek. Únemdilik birden kózge túsedi.
Bul jańashyldyqqa jekemenshik balabaqsha ıeleri de qýanyshty. Budan bylaı ata-analar arzanyraq balabaqsha izdep memlekettik mekemege balalaryn aýystyrmaıtyn bolady.
- Osyǵan deıin bizdiń balabaqshada bolǵan balalar kezegi kelip jetkende memlekettik balabaqshaǵa aýysyp ketetin, - deıdi Qaraǵandydaǵy tórt jeke menshik balabaqshanyń quryltaıshysy Gúlnár Smaılova. - Sonan soń ol orynǵa basqa bala kele me, joq pa, biz ony bilmeıtinbiz. Endi myna jeńildikterdiń arqasynda biz, kásipkerler, turaqty bıznes júrgizemiz. Bizdiń balabaqshalarymyz 10 paıyzǵa tolyq bolatynyna senimdi bolamyz. Ol degenimiz, ári qaraı damýǵa negiz paıda boldy degen sóz.
Esterińizge sala keteıik, jekemenshik balabaqshalardaǵy memlekettik tapsyrystyń somasy bir balaǵa 26000 teńgeni quraıdy. Bul Qazaqstan boıynsha eń joǵary kórsetkish.
Qaraǵandyda barlyǵy 41 memlekettik jáne 32 jekemenshik balabaqsha jumys isteıdi. Sońǵylarynyń 25-i memlekettik tapsyrys qabyldaıdy.
