Qaraǵandyda memqyzmetkerler arasynda patrıottyq án baıqaýy ótti
«Shalqyma» kontserttik zalynyń sahnasynda 24 qatysýshy óz ónerin ortaǵa saldy.
«Biz mundaı baıqaýdy memlekettik qyzmetker kúnine oraılastyryp alǵash ret uıymdastyryp otyrmyz. Barlyq qatysýshylardyń jaqsy daıyndalǵandary kórinip tur. Olardyń arasynda eki dýet te bar. Óner kórsetýshilerdiń bireýi óziniń oryndaǵan ánine beınebaıan daıyndaǵan. Al taǵy biriniń áni horeografııalyq ujymynyń bıimen súıemeldengen. Sondaı-aq kent ákimi de bar. Baıqaýdyń úsh jeńimpazyn biz Memlekettik qyzmetker kúninde marapattaıtyn bolamyz», - dedi Qaraǵandy oblysy boıynsha memlekettik qyzmet isteri jónindegi jáne sybaılas jemqorlyqpen kúres departamenti basshysynyń orynbasary Medet Talant.
Qazylar alqasynyń pikirinshe, baıqaýǵa qatysýshylar barlyq tapsyrmalardy jaqsy oryndaǵan. Mýzykalyq bilimi bolmasa da, kásibı ánshilerden kem túspesten án shyrqap shyqty.
«Biz dýetpen «Aýylym» ánin oryndadyq. Bizde ózimizdiń shaǵyn ansamblimiz quryldy desek te bolady. Men dombyrada, al áriptesim baıanda oınaıdy. Bizdiń arnaıy mýzykalyq bilimimiz joq, alaıda kishkentaıymyzdan án aıtýdy unatamyz. Sondyqtan eshqandaı qobaljý bolǵan joq», - deıdi Qarqaraly aýdany Baqty aýylynyń ákimi Bolat Jabdyqov.
Jańaarqa aýdany Jumajanov aýyldyq okrýgi ákimi apparatynyń jetekshi mamany Indıra Rahymbaeva da sahnada alǵash ret óner kórsetýde. 
«Ózimizdiń aýdanda barlyq sharalarda án aıtamyn. Án shyrqaǵandy unatamyn, bul meniń hobbıim desem de bolady. Bul baıqaýda Gúlnur Orazymbetovanyń «Kókke órle» ánin oryndadym», - deıdi Indıra Rahymbaeva.
Qaraǵandy oblysy statıstıka departamentiniń aǵa mamany Nursultan Ahmetov án baıqaýyna bir aptadan asa ýaqyt daıyndalǵan eken. Kásibı sheberlerden vokal dárisin alǵan.
«Men «MýzArt» tobynyń «Rahmet saǵan týǵan el» ánin tańdadym. Osyndaı baıqaýǵa saı keletin án dep oılaımyn», - dedi Nursultan Ahmetov.
Qazylar alqasynyń sheshimi boıynsha birinshi oryndy Osakarov aýdandyq máslıhat apparatynyń jetekshisi Erjan Naımanbaı ıelendi. Ekinshi oryn «Jezqazǵan kenti ákiminiń apparaty» MM ekonomıka bóliminiń jetekshisi Abaı Bekishevke berildi. Úshinshi oryn Qaraǵandy oblysynyń Memlekettik kirister departamentiniń bas mamany Tólegen Ysqaqovqa buıyrdy. 
Jeńimpazdarǵa dıplomdar, al qatysýshylarǵa sertıfıkattar men estelik syılyqtar tabys etildi. Baıqaý jeńimpazdary Memlekettik qyzmetker kúninde uıymdastyrylatyn saltanatty jıynǵa qatysady.
