Qaraǵandyda mektep jetispeýshiligi men úsh aýysymdy oqytý máselesi qalaı sheshilmek
Qaraǵandy oblystyq bilim basqarmasynyń basshysy Gúlsim Qojahmetova qaı shaǵyn aýdandarda jańa mektepter paıda bolatynyn aıtyp berdi, dep habarlaıdy QazAqparat tilshisi.
Qaraǵandy óńiriniń bas pedagogynyń aıtýynsha, jyl saıyn oblys ortalyǵynyń belgili bir shaǵyn aýdandarynda jas otbasylar, sáıkesinshe mektep jasyndaǵy balalar sany artyp keledi. Osyǵan baılanysty atalǵan aýdandarda jańa bilim berý nysandaryn salý týraly sheshim qabyldandy.
«Ýrbanızatsııa men bala týý kórsetkishteriniń ósýine baılanysty Qaraǵandyda oqýshy balalar sany artyp keledi. Jańa oqý jylynda úsh aýysymdy oqytý 11a shaǵyn aýdanyndaǵy №34 jáne «Gúlder-1» shaǵyn aýdanyndaǵy №101 mektepterde ótip jatyr. Kúngeı, Taýgúl, Kendala jáne Kógildir toǵandar shaǵyn aýdandarynyń jańa qurylystarynyń janynda jańa mektepter salý qajettiligi bar. Bul shaǵyn aýdandarda oryn tapshylyǵy máselesin sheshý úshin 2022-2025 jyldarǵa 5 mektep salý josparlanǵan, onyń ishinde 2-ýi memlekettik-jeke menshik áriptestik esebinen. Sonymen qatar, 11a shaǵyn aýdanda úsh aýysymdyq oqý máselesin sheshetin mektep qurylysy aıaqtalýda. Taýgúl shaǵyn aýdanynda memlekettik jekemenshik áriptestik aıasynda mektep qurylysy bastaldy», - dep atap ótti Gúlsim Qojahmetova.
Qaraǵandyda salynatyn jańa mektepterden basqa, oblysta taǵy 10 bilim berý nysanynyń qurylysy júrip jatyr. Olardyń ishinde aýyldyq óńirlerde 3 mektep, 4 japsarlas qurylys, 2 balabaqsha, Sátpaev qalasynda oqýshylar saraıy bar.
«Aýyl mektepterin jańǵyrtýdy jalǵastyramyz, 57 mektepke kúrdeli jáne aǵymdaǵy jóndeý júrgizildi. Jyl sońyna deıin 61 mektep kitaphanasy men 9 mektep ashanasy, 26 mektep pándik kabınettermen jabdyqtalyp, 12 mektepte jıhaz jańartylady. «Nur-Otannyń» «Jol kartasy» aıasynda 2025 jylǵa deıin taǵy 299 aýyl mektebin jańǵyrtý josparlanǵan», - dedi bilim basqarmasynyń basshysy.