Qaraǵandyda mas júrgizýshiniń kinásinen zardap shekken áıel kóz jumdy
QARAǴANDY. QazAqparat – Búgin Qaraǵandyda mas júrgizýshiniń kinásinen oryn alǵan kólik apatynyń saldarynan zardap shekken áıel aýrýhanada kóz jumdy. Apat sebepkeri ishimdik iship alyp, óziniń «Lexus 570» kóligimen kópqabatty turǵyn úılerdiń aýlasynda turǵan 5 kólikti soqqan bolatyn, dep habarlaıdy QazAqparat tilshisi.
«Jol-kólik oqıǵasynan zardap shekken adam búgin tańǵy 4-te qaıtys boldy», - dep habarlady Qaraǵandy oblysynyń Densaýlyq saqtaý basqarmasy.
Eske sala keteıik , 20 qazan kúni 49 jasar «Lexus 570» avtokóliginiń júrgizýshisi mas kúıinde Stepnoı-4 shaǵynaýdanyndaǵy úıdiń aýlasynda turǵan bes avtokólikke soqtyǵysqan. Oqıǵa ornyna patrýldik polıtsııa polkiniń jáne ońtústik-shyǵys polıtsııa bóliminiń jedel-tergeý toby jiberildi. Jol-kólik oqıǵasyna kináli adamdy ustaý kezinde belgisiz tulǵalar patrýldik polıtseılerdiń jumysyna kedergi keltirmek bolǵan. Olarǵa qatysty óz mindetterin atqarý kezinde polıtsııa qyzmetkerlerine baǵynbaǵany úshin ákimshilik hattamalar toltyryldy.
JKO saldarynan 25 jastaǵy er adam men 29 jastaǵy áıel aýrýhanaǵa jatqyzyldy.
