Qaraǵandyda mas jolaýshy avtobýsqa «jarylǵysh» qoıǵan
QARAǴANDY. QazAqparat - Qaraǵandyda ishinde 47 adamy bar avtobýsqa «jarylǵysh zat qoıǵan» mas 38 jastaǵy er adam ustaldy. Bul týraly oblystyq ІІD baspasóz qyzmeti habarlady.
Oqıǵa 22 mamyrda keshki jetiler shamasynda oryn alǵan.
«102 telefonyna avtobýs kondýktory habarlasyp, salonda birneshe sekýndtan keıin bomba jarylatynyn málimdegen. Júrgizýshi avtobýsty toqtatyp, 47 adam syrtqa shyqqan. «Arlan» arnaıy bólimshesiniń saperleri avtobýsty tekserip, jarylǵysh zat tappady. Saǵat 19.50-de izdeý toqtatyldy», - dedi ІІD baspasóz qyzmetiniń basshysy B. Qudııarov.
Onyń aıtýynsha, Qaraǵandy ІІB jol-patrýldik polıtsııasy polkiniń qyzmetkerleri oqıǵa ornynan mas 38 jastaǵy er adamdy ustady.
«Ustalǵan adam ýaqytsha ustaý ızolıatoryna qamaldy. Oǵan QR QK 273-baby boıynsha sot aldy tergeý júrgizilýde», - dedi ol.
