Qaraǵandyda mas kúıinde kólik júrgizgen azamat qamaýǵa alyndy
QARAǴANDY. QazAqparat – 11 qańtardan bastap elimizde kólik quraldaryn mas kúıinde júrgizgeni úshin jaýapkershilikti kúsheıtý týraly Zań kúshine endi.
Qaraǵandyda osyndaı zań buzǵan azamatty quryqtaý boıynsha alǵashqy derek tirkeldi, dep habarlaıdy QazAqparat tilshisi.
11 qańtarda polıtsııa qyzmetkerleri avtokólikti mas kúıinde basqarǵan Qaraǵandy qalasynyń 37 jastaǵy turǵynyn ustady. Ol 2018 jyly sot sheshimimen kólik basqarý quqyǵynan aıyrylǵan. Alaıda, soǵan qaramastan, ol mas kúıinde taǵy da rólge otyrǵan. Oǵan qatysty sot sanktsııasymen qoǵamnan oqshaýlaý jóninde bultartpaý sharasy tańdaldy. Bul fakti boıynsha tártip buzýshyǵa ómir boıyna kólik júrgizý quqyǵynan jáne 5 jylǵa deıin bas bostandyǵynan aıyrý jazasy qoldanylýy múmkin.
«Bul Qaraǵandy oblysynda kólik quraldaryn mas kúıinde júrgizgeni úshin jaýapkershilikti kúsheıtetin zań kúshine engennen keıin jasalǵan alǵashqy quqyqbuzýshylyq. Polıtsııa departamenti tarapynan barlyq quqyq buzýshylarǵa osyndaı qatań sharalar qoldanylatyn bolady. Sondyqtan, barlyq azamattarǵa rólge otyrmas buryn, bas bostandyǵynan aıyrylýy múmkindigin eske salamyz», - dedi oblystyq Polıtsııa departamenti tergeý basqarmasynyń bastyǵy Almaz Salamatov.
Sonymen qatar, osy zańmen mal urlyǵy, zorlaý, qaraqshylyq, brakonerlik jáne esirtki zattaryn ótkizý, olardy jarnamalaý jáne nasıhattaý úshin jaýapkershilik kúsheıtildi.
