Qaraǵandyda mas áıeldi avtobýstan ıterip, shyǵaryp jibergender izdestirilýde
QARAǴANDY. QazAqparat – Áleýmettik jelide Qaraǵandyda mas áıeldi belgisiz er adam avtobýstan ıterip shyǵaryp jiberip, soqqyǵa jyqqany týraly beınematerıal tarady.
Polıtsııa jábirlenýshiniń jáne oǵan soqqyǵa jyqqandardyń kim ekenin anyqtaýda, dep habarlaıdy QazAqparat tilshisi.
Jelide belgisiz adamdar mas áıeldi avtobýstan ıterip shyǵaryp jatqan beınetúsirilim paıda boldy. Kadrlarda er adam mas áıeldi qoǵamdyq kólikten ıterip shyǵarǵany, sonan soń basynan tepkeni baıqalady.
«Qaraǵandy-Temirtaý baǵytynda júretin avtobýs, onyń 41 jastaǵy júrgizýshisi jáne 25 jastaǵy kondýktory anyqtaldy. Sońǵysy 28 qyrkúıekte saǵat 16.30 shamasynda «Kenshiler MÚ» aıaldamasynda avtobýsqa mas kúıinde áıel adam kirgenin túsindirdi. Ol qoǵamdyqta dórekilik kórsetken - jan jaǵyndaǵylardy balaǵattap, ádepsizdik tanytyp, jol aqysyn tóleýden bas tartty. Temirtaýǵa jetkende, «Kooperator» aıaldamasynda kondýktor men jolaýshylar bul áıeldi salonnan shyǵardy. Osydan keıin belgisiz bireý oǵan dene jaraqatyn salǵan», - dep habarlady Qaraǵandy oblysy PD baspasóz qyzmeti.
Qazirgi ýaqytta polıtsııa qyzmetkerleri jábirlenýshiniń jáne osy qylmystyq quqyq buzýshylyqqa qatysy bar adamnyń kim ekenin anyqtaý boıynsha is-sharalar júrgizýde. Atalǵan faktige qatysty QR QK 293-baby «Buzaqylyq» boıynsha qylmystyq is qozǵaldy.
