Qaraǵandyda mammologııalyq ortalyq ashyldy

Medıtsınalyq mekemede oblystaǵy jalǵyz tomosıntez apparaty jumys isteıdi. Ol kólemi birneshe mıllımetr ǵana bolatyn isikti anyqtaýǵa qabiletti, dep habarlaıdy QazAqparat tilshisi.

Ortalyq «Olymp Medical Group» JShS-niń jeke qarajaty esebinen salynǵan jáne jabdyqtalǵan. Bul jerde mammologtar, hırýrgtar, endokrınologtar men gınekologtar qabyldaý júrgizedi.

Medıtsınalyq mekemede ornatylǵan joǵary tehnologııalyq jabdyqtar sút bezi obyrynyń jáne basqa da aýrýlardyń erte dıagnostıkasyn júrgizýge múmkindik beredi. Ortalyqtyń basty artyqshylyǵy biregeı tomosıntez apparatynda. Ol keýdeniń san túrli túsirilimin jasap, artynan ony elektrondy 3D úlgisine transformatsııalaı alady. Mundaı apparat Qaraǵandy oblysy boıynsha jalǵyz, al memleket boıynsha úshinshi.

Qajet bolǵan jaǵdaıda, bul apparattan tekserýden tipti er adamdar da óte alady. Tomosıntezde kompressııa joq.

«Sandyq tomosıntez qazir jańa tehnologııa retinde tirkelip, bıyl ony tarıfke engizý josparlanyp otyr. Osy zertteý tarıfi resmı maquldanǵannan keıin, ol memlekettik tapsyrys jáne mindetti medıtsınalyq saqtandyrý sheńberinde ótedi», - dedi «Olymp Medical Group» JShS bas dırektory Erjan Súleımenov.

Jańa ortalyqta medıtsınalyq saqtandyrý sharasynyń qatysýshylary mammologııalyq jáne plastıkalyq hırýrgııany qosa alǵanda, tegin qyzmetter ala alady.

Ortalyq Qaraǵandy qalasynda Krıvogýz kóshesi, 76/3 mekenjaıy boıynsha ornalasqan.