Qaraǵandyda Mádı Bapıuly atyndaǵy dástúrli án oryndaýshylar baıqaýy ótýde
QARAǴANDY. QazAqparat - Qaraǵandyda Mádı Bapıuly atyndaǵy IV respýblıkalyq dástúrli oryndaýshylar baıqaýy ótip jatyr. Sharanyń ashylý saltanaty «Saryjaılaý» kınoteatrynyń zalynda ótti, dep habarlaıdy QazAqparat tilshisi.
«Biz Mádı Bapıulynyń shyǵarmashylyǵyn nasıhattaýymyz kerek. Bul rette sizder, jas oryndaýshylar bizge kómektesesizder. Sizder onyń ánderin kelesi urpaqqa úıretip, onyń oryndalý dástúrin jalǵastyrasyzdar», - dedi qazylar alqasynyń tóraǵasy, QR Memlekettik syılyǵynyń laýreaty Qaırat Baıbosynov.
Bıylǵy jyly baıqaýǵa 40 ótinim kelip tústi. 34 qatysýshy irikteý kezeńinen ótti. Olar eki kún boıy dástúrli ánderdiń úzdik oryndaýshysy ataǵy úshin saıysqa túsedi.
Baıqaýǵa qatysýshylar Nur-Sultan, Qostanaı, Kókshetaý, Petropavl, Almaty, Semeı jáne Qaraǵandy oblystarynan keldi. Dodaǵa 17-den 40-qa deıingi jas aralyǵyndaǵy oryndaýshylar qatysty. Eki týrda olar úsh án oryndaıdy, olardyń biri Mádı Bapıulynyń týyndysy bolýy tıis.
«Bul baıqaýǵa men úshinshi ret qatysýdamyn. Meniń oıymsha, jaqsy daıyndaldym. Men Mádı Bapıulynyń birneshe ánderin bilemin. »Shirkin-aı« men »Úshqarany« oryndaımyn», - deıdi almatylyq qatysýshy Nursultan Elemesov.
«Men Qaraǵandy oblysynda týdym, biraq bul baıqaýǵa Almaty qalasynyń atynan qatysamyn. »Jıyrma bes« jáne »Áýpildek« halyq ánderin, Asettiń »Qysmet« ánin, Aqan seriniń »Maqpal« ánin, sondaı-aq Mádıdiń »Shirkin-aı« jáne »Qarakesek« ánderin daıyndadym», - deıdi baıqaýǵa qatysýshy, Qurmanǵazy atyndaǵy Qazaq ulttyq konservatorııasynyń 3 kýrs stýdenti Dıana Altaıqyzy.
Uıymdastyrýshylardyń aıtýynsha, Ámire Qashaýbaev, Qalı Baıjanov, Ǵabbas Aıtpaev, Manarbek Erjanov mártebesin asqaqtatqan dástúrli halyq áni mektebiniń eki ǵasyrlyq tarıhy bar. Qazaq aqyny, ánshi, kompozıtor Mádı Bapıuly bala kezinen dombyrada án aıtyp, dombyrada oınaýmen tanymal boldy. Belgili sýyrypsalma ánshi Aqan serimen jáne Birjan salmen kezdesip, olarǵa Mádı óz ónerin kórsetken, olardan tálim alǵan.
Mádı Bapıulynyń shyǵarmashylyq murasy tolyǵymen jınalǵan joq. Onyń ánderin E. G. Brýsılovskıı «Qarakesek», «Shırkın-aı», «Mádı», «Qyz Jibek» sekildi alǵashqy Qazaq ulttyq operalarynda qoldanǵan.
Baıqaý «Shalqyma» kontsert zalynyń sahnasynda ótip jatyr.
8 qarashada saǵat 18.30-da jeńimpazdardy marapattaý jáne gala-kontsert bolady.
