Qaraǵandyda Mádenıet jáne demalys saıabaqtary basqarmasynyń basshysy jumysynan bosatyldy
QARAǴANDY. QazAqparat - Búgin Qaraǵandy qalasynyń ákimi Nurlan Áýbákirov jınalys ótkizip, onyń barysynda Mádenıet, demalys saıabaqtary jáne gúlzarlar basqarmasynyń basshysy Rústem Kódebaevtiń qyzmetinen bosatylǵanyn málimdedi, dep habarlaıdy QazAqparat ekaraganda.kzsaıtyna silteme jasap.
Basqarma basshysynyń qyzmetinen ketýine 25 mamyrda Ortalyq saıabaqta qatty jelden batýttyń aýdarylyp, 11 jasar balanyń kóz jumýy sebep bolǵan.
Saıabaqtar basqarmasynyń basshysy mindetin ýaqytsha vedomstvonyń bas ınjeneri Talǵat Smaıylov atqarady.
Budan bólek, Saıabaqtar basqarmasy qyzmetine vedomstvolyq baqylaý júrgizbegeni úshin Qaraǵandy qalasy kommýnaldyq sharýashylyq, jolaýshylar kóligi jáne avtomobıl joldary bóliminiń basshysy mindetin atqarýshy Álibek Dúısembekovke qatań sógis jarııalandy.
Qala ákiminiń orynbasary Sábıt Ospanovqa qyzmettik mindetterin durys oryndamaǵany úshin sógis berildi.
Eske salaıyq, 25 mamyr kúni Qaraǵandydaǵy Ortalyq saıabaqta qatty jelden úrlemeli batýt jaqyn mańda ornalasqan dúńgirshektiń ústine aýdarylyp túsken bolatyn. Saldarynan 2007 jyly týǵan jetkinshek qaza boldy. 2004 jáne 2012 jyly týǵan úsh bala túrli jaraqatpen aýrýhanaǵa jetkizildi. Oqıǵaǵa baılanysty qylmystyq is qozǵaldy. Saýyq nysanyn zańsyz ári, talapqa saı ornalastyrmaǵany úshin qalanyń 40 jastaǵy turǵyny ustalyp, ýaqytsha ustaý ızolıatoryna qamaldy.
Búgin belgili bolǵandaı, aýdarylǵan batýttyń qojaıyny Qaraǵandy oblysynyń Abaı qalasynda órt sóndirý bólimin basqarǵan. Bıylǵy 20 mamyrda jumystan bosatý týraly raport bergen.
