Qaraǵandyda Lıtva eliniń JOO-men áriptestik ornatý múmkindikteri talqylandy
Sapardyń maqsaty akademııalyq tájirıbe almasý jáne Lıtva joǵary oqý oryndarymen ǵylymı yntymaqtastyq salasyndaǵy baǵdarlamalardyń tusaýkeserin ótkizý boldy.
Qaraǵandy medıtsına ýnıversıtetinde Lıtvanyń Qurmetti konsýly Vıtalıı Tvarıonastyń qatysýymen konferentsııa ótti. Kezdesýge Qaraǵandy joǵary oqý oryndarynyń ókilderi qatysty. Olarǵa ýnıversıtet arasyndaǵy Medıtsınalyq jáne tehnıkalyq baǵyttaǵy, jaratylystaný ǵylymdary salasyndaǵy yntymaqtastyq múmkindikteri týraly aıtty.
QMÝ rektory, professor Raýshan Dosmaǵambetova joǵary oqý orny kóptegen otandyq jáne eýropalyq ýnıversıtettermen yntymaqtastyqta ekenin atap ótti. KMÝ-dyń basty strategııalyq seriktesi Lýnd ýnıversıteti (Shvetsııa) bolyp tabylady.
«Sonymen qatar bizdiń ýnıversıtettiń árbir mektebi bilim berý jáne ǵylymı qyzmetti tabysty damytý úshin seriktes tańdaıdy. Vılnıýs ýnıversıteti Medıtsına mektebiniń seriktesi boldy. Bul bilim berý baǵdarlamalaryn damytý úshin úlken múmkindikter ashty. Osy jyly Vılnıýs ýnıversıtetiniń medıtsına fakýlteti dekanynyń orynbasary bolyp tabylatyn KMÝ rektorynyń orynbasary Vaıva Hendrıksonmen birge, bizdiń JOO-da otbasylyq medıtsına boıynsha rezıdentýra baǵdarlamasy ázirlendi. Stýdentterdiń tájirıbe almasýyn júzege asyrýǵa, Lıtvadan professorlardy shaqyrýǵa múmkindik týdy. Vılnıýs ýnıversıtetimen birge biz sapany basqarý júıesin jetildiremiz», - dedi Raýshan Dosmaǵambetova.
Konferentsııa EO jobasy aıasynda Vılnıýs ýnıversıteti tarapynan uıymdastyryldy. Kezdesýge qatysýshylar barlyq qajetti aqparatty alyp, baılanystarmen almasty.
