Qaraǵandyda qyzylshaǵa qarsy qosymsha sharalar júrgizilýde
QARAǴANDY. QazAqparat - Densaýlyq saqtaý basqarmasynyń basshysy Erjan Nurlybaev Qaraǵandy oblysynda qyzylshaǵa qarsy qosymsha ımmýndaý júrgiziletini týraly aıtyp berdi, dep habarlaıdy QazAqparat tilshisi.
QR Densaýlyq saqtaý mınıstrligi qosymsha ımmýndaý júrgizý týraly sheshim qabyldady. Shara barysynda 9-10 aılyq (nóldik egý) balalar egiledi. Dál sol balalar 2-3 aıdan keıin 12 aıda alýy tıis josparly vaktsınatsııadan ótedi. Sodan keıin Ulttyq profılaktıkalyq egý kúntizbesine sáıkes 6 jasta ekpe jasalady.
«Oblysta qyzylsha aýrýyna kúdikti 170 oqıǵa tirkelgen, 87 jaǵdaıda dıagnoz zerthanalyq túrde rastaldy. Biz kórshi aımaqtar sekildi qyzylshanyń órshýin baıqamadyq. Qabyldanǵan sharalar óz áserin berdi. 1 sáýirden bastap revaktsınatsııa bastaldy. Bul degenimiz, vaktsınatsııa jasaǵan adamdar turaqty ımmýnıtet úshin osy protsedýradan qaıtadan ótedi. Bizdiń ótinishimiz boıynsha Densaýlyq saqtaý mınıstrligi qosymsha 97 mln teńge bóldi. Bul qarajatqa qosymsha vaktsına, onyń ishinde qyzylshaǵa qarsy vaktsına satyp alyndy», - dedi Erjan Nurlybaev.
Qosymsha ımmýndaý sharasy 40 jasqa deıingi medıtsına qyzmetkerleri arasynda da júrgiziledi. Sodan keıin 30 jasqa deıingi turǵyndarǵa ekpe jasalady.
Immýndaý sharasy turǵyndardyń mekenjaıy boıynsha tirkelgen emhanalarynda júrgiziledi. Sondaı-aq oblysta qyzylshaǵa shaldyǵý oqıǵalaryn tirkeý kezinde baılanysta bolǵan adamdardyń epıdemııalyq kórsetkishteri boıynsha ımmýndaý jalǵasýda.
