Qaraǵandyda qyzmettik kóligimen balasyn mektepke tasyǵan sot tóraǵasy eskertýmen qutyldy

QARAǴANDY. QazAqparat – Qaraǵandy oblysynyń qylmystyq ister jónindegi arnaıy sotynyń tóraǵasy eskertý aldy. Ol qyzmettik kóligin jumystan tys paıdalanyp, balalaryn mektepke aparǵany anyqtalǵan, dep habarlaıdy QazAqparat tilshisi.

Qaraǵandy oblysynyń qylmystyq ister jónindegi arnaıy sotynyń tóraǵasy Bekzat Shalǵymbaevtyń qyzmettik kóligimen balalaryn mektepke tasymaldaǵany týraly beınejazba ótken jyldyń jeltoqsan aıynda áleýmettik jelilerde jarııalanǵan bolatyn.

Kýágerler qyzmettik kólikten sýdıanyń balasy shyǵyp bara jatqanyn, ony mektepke júrgizýshisi alyp kelgenin túsirip alǵan bolatyn.

Tekserý qorytyndysy boıynsha qyzmettik kólikti jeke maqsatta paıdalaný bóliginde buzýshylyqtar anyqtalǵany belgili boldy.

Materıaldar Joǵary sot keńesi janyndaǵy sot alqasyna berildi. Tekseris qorytyndysy boıynsha Bekzat Shalǵymbaev tártiptik jaýapkershilikke tartyldy.

«Qazaqstannyń Joǵary sot keńesi janyndaǵy sot alqasynyń sheshimimen Bekzat Shalǵymbaev Sýdıa ádebi kodeksiniń normalaryn buzǵany úshin eskertý túrinde tártiptik jaýapkershilikke tartyldy», - dep málimdedi Qaraǵandy oblystyq sotynyń baspasóz qyzmeti.