Qaraǵandyda qyzmetin atqaryp turǵan polıtseıge 4 jasar qyzy tikeleı efırde habarlasty
QARAǴANDY. QazAqparat – Qaraǵandy qalasyndaǵy telearnanyń jýrnalısi blok bekette qyzmetin atqaryp turǵan polıtseıge tosynsyı jasady. Qyzmet babymen úıine sırek baratyn polıtseıge tikeleı efırde kishkentaı qyzy habarlasty, dep habarlaıdy QazAqparat tilshisi.
«SARYARQA» aımaqtyq telearnasynda respýblıkalyq «Almaty-Ekaterınbýrg» tasjolyndaǵy blokbekettiń jumysy týraly reportaj shyqty. Telearna tilshileri medıtsına qyzmetkerleri men polıtseılerden tótenshe jaǵdaı kezinde qalaı jumys istep jatqany týraly suraǵan bolatyn. Sebebi dál osy mamandyq ıeleri koronavırýspen kúreste aldyńǵy shepte tur. Jol-patrýl polıtsııa qyzmetkeri, polıtsııa aǵa leıtenanty Áset Qaıratov TJ rejımin engizgennen beri qyzmet atqarýdyń kúsheıtilgen túrine aýysqanyn jáne otbasyn sırek kóretinin aıtqan. Tártip saqshylary demalyssyz jáne táýligine 12 saǵattan jumys atqarýda.
Polıtseı jýrnalıstiń «Otbasyńyzdy qanshalyqty jıi kóre alasyz?» degen suraǵyna «Óte sırek kóremin. Tańerteń qyzmetke ketip bara jatqanda qyzym áli uıyqtap jatady, keshke qaıtyp oralǵanda áıelim balamdy uıyqtatyp jatady» dep jaýap berdi.
Tártip saqshysynyń bul sózinen soń jýrnalıster oǵan tosynsyı jasady. Tikeleı efırde oǵan 4 jasar qyzy Aılın habarlasty.
«Ákeshim, sen tańerteń de, keshke de jumystasyń. Úıge qashan oralasyń? Men sizdi qatty saǵyndym!» deıdi ol.
Ákesi oǵan «Men de seni qatty saǵyndym. Qyzym, men de seni qatty jaqsy kóremin!» dep jaýap berdi.
Polıtsııa aǵa leıtenanty Áset Qaıratov kútpegen jerden osyndaı tosyn syı ony qatty tolqytqanyn jetkizdi. Polıtsııa qyzmetkeri jýrnalısterge qıyn kezeńde oǵan osyndaı baqytty sát syılaǵany úshin alǵysyn bildirdi.
