Qaraǵandyda qyzǵanshaq jigit áıelin býyndyryp óltirdi
QARAǴANDY. QazAqparat – Búgin Qaraǵandy qalasynda 29 jastaǵy kelinshektiń máıiti tabyldy. Belgili bolǵandaı, 27 jastaǵy jigit qyzǵanyshtan birge turyp jatqan áıelin óz qolymen tunshyqtyryp óltirgen, dep habarlaıdy QazAqparat tilshisi.
30 shilde kúni saǵat 13:30-da Qaraǵandy qalasyndaǵy bir úıdiń mańynan 29 jastaǵy áıeldiń denesi tabyldy. Polıtsııa qyzmetkerleri izin sýytpastan ólgen áıelmen birge turyp jatqan 27 jastaǵy azamatty ustady.
Kúdikti bastapqyda jedel ýákilderdi jalǵan izge salyp jibergisi kelgen. Alaıda, polıtseılerdiń kásibı is-áreketiniń arqasynda jedel-tergeý jolymen oǵan qarsy aıǵaqtar tabylǵan. Nátıjesinde er adam janjal barysynda qyzǵanyshtan jábirlenýshini óz qolymen býyndyrǵanyn moıyndady.
Atalǵan derek boıynsha QR QK 99-babynyń 1-bóligi boıynsha sotqa deıingi tergeý bastaldy (kisi óltirý).
