Qaraǵandyda qylmyskerler polıtsııaǵa qarýly qarsylyq kórsetti
QARAǴANDY. QazAqparat - Qaraǵandyda polıtsııa qyzmetkerleri urlyq jasaǵan kúdiktilerdi ustaý kezinde kúsh qoldanýǵa týra keldi, dep habarlady oblystyq ІІD-niń baspasóz qyzmetinen.
Oqıǵa 19 qańtar kúni Qaraǵandydaǵy Chkalov kóshesinde ornalasqan bank ǵımaratynyń janynda oryn alǵan.
«53 jastaǵy jeke kásipkerdiń «Dodj» kóliginiń dóńgelegin búldirgen eki er adam ishinen múlkin urlap áketpek bolǵan. Oqıǵa bolǵan jerge jaqyn júrgen polıtsııa qyzmetkerleri kómekke kelip jetti. Alaıda kúdiktiler tártip saqshylaryna pyshaq kezep, qarsylyq kórsetken. Polıtsııa olarǵa jekpe-jek ádisterin qoldanýǵa májbúr boldy», - delingen habarlamada.
Ustalǵandar - Temirtaý qalasynyń 26-28 jasar turǵyndary. Qazir osy qylmys boıynsha tergeý júrgizilip jatyr, eki jigit ýaqytsha ustaý abaqtysyna qamaldy.
