Qaraǵandyda KVI-men aýyratyn naýqastarǵa arnalǵan pýlmoprovızorlyq gospıtal ashylady
QARAǴANDY. QazAqparat - Qaraǵandyda COVID-19 naýqastaryna arnalǵan 250 tósektik pýlmoprovızorlyq gospıtal ashylady. Ony Maıqudyq shaǵynaýdanyndaǵy №1 qalalyq aýrýhana bazasynda jabdyqtaıdy. Bul týraly Densaýlyq saqtaý basqarmasynyń basshysy Erjan Nurlybaev onlaın rejıminde ótken baspasóz máslıhatynda málimdedi, dep habarlaıdy QazAqparat tilshisi.
Qaraǵandyda eki pýlmoprovızorlyq gospıtal jumys isteıdi.
«Qazir oblystyq aýrýhanalar 70%-ǵa júktelgen. Qor bar, biraq sońǵy aptada juqtyrǵandardyń sany kúrt ósti. Eger buryn táýligine ortasha eseppen 50 adamnan aýrýhanaǵa jatqyzylsa, qazir 70-ten joǵary. Sondyqtan taǵy bir aýrýhana jabdyqtaý qajettiligi týyndady», - dedi Erjan Nurlybaev.
COVID-19 aýyr aǵymy bar patsıentterdiń sany da ósti. Qazir jansaqtaý bóliminde 29 adam bar. Olardyń toǵyzy ÓJJ apparattaryna qosylǵan. Erekshe baqylaýda jatqandardyń kópshiligi qart jáne egde adamdar.
Mundaı ósimniń sebebin Densaýlyq saqtaý basqarmasynyń basshysy medıtsınalyq kómekke ýaqytynda júginbeýdiń saldarynan týyndaıtynyn aıtady.
«Ókinishke oraı, adamdar óz betimen emdelýge tyrysady. Men barlyq turǵyndardy kezde JRVI-diń alǵashqy belgileri paıda bolǵan bette dárigerge júginýge shaqyramyn. Áleýmettik jelilerde KVI naýqastaryna ınektsııa salmaıdy, sondyqtan statsıonarlarda durys emdemeıdi degen pikirler aıtylýda. Biraq koronavırýstyq ınfektsııa kezinde kóktamyr arqyly dári jiberý ókpeniń isinýi jáne basqa da aýyr zardaptarǵa ákelýi múmkin. Sondyqtan emdelýshiniń jaǵdaıy ázirge tabletkalanǵan preparattarmen emdeýge múmkindik berse, biz osy ádisti qoldanamyz», - dep túsindirdi Erjan Nurlybaev.
Sońǵy aptada jedel járdem shaqyrýlarynyń sany 20%-ǵa artty. Jedel járdemge túsetin júktemeni azaıtý úshin JRVI belgileri bar adamdarǵa emhanalardan brıgada shyǵady. Olardyń ıeligine ýaqytsha 20-ǵa jýyq kólik berildi.
Búgingi kúni Qaraǵandy oblysynda 1 897 COVID-19 naýqas tirkelgen, onyń 864-i dertten saýyǵyp shyqqandar.
